Inatsimmik sukaterineq kisimi aqqutissaanngitsoraa
Imigassaq Ikiaroornartorlu pillugu Siunnersuisooqatigiinnit siunnersuutigineqarpoq, ikiaroornartoq pillugu inatsisip sukateriffigineqarnissaa.
- Siunnersuutigineqartoq naalakkersoqatinnut apuutissavara. Taamaattorli isumaqanngilanga politiit ikiaroornartumik akiuiniarlutik sulinerat kisiat isumalluutigisinnaagipput. Suliniutit tamakkiisuullutillu assigiinngitsunut saamitinneqartariaqarput, taamaaliorutta aatsaat angusarissaassasugut upperaara, Ilaqutariinnermut peqqissutsimullu Naalakkersuisoq, Asii Chemnitz Narup oqarpoq.
Naalakkersuisup ilanngullugu oqaatigaa, Paarisamit Naalakkersuisunillu pingaartinneqartoq, akiuiniarnermi sapinngisamik angajoqqaat qanimut suleqatigineqarnissaat. Tamannalu aamma piffinni assigiinngitsuni misilittagaqarluarfiginerarpaa.
Kikkut tamarmik inuuniarnermikkut atugaasa nalinginnaasut pitsaasuunissaat anguniarneqartariaqarnerarpaa, taamaalilluni aamma meeqqat inooqataanerminni nuannersumik atorfissaqartinneqartutullu misiginerminni ikiaroorniutinut saannginnissaat anguneqarsinnaanerarlugu.
