Inatsiartut angallannermi mianersoqqusipput
Inatsisartut ippassaq ataatsimiinneranni imaatigut angallanermi sillimaniarnerup sukateriffigineqarnissaa ilaasortanit pingasunit siunnersuuteqarfigineqarpoq.
Siumut sinnerlugu Intsisartuni ilaasortaq Isak Davidsen siunnersuuteqarpoq, umiatsiamik pisisut tamarmik puttaqummik annanniuteqartarnissaat piumasaqaataasariaqartoq.
Atassut sinnerlugu inatsisartuni ilaasortanit aamma siunnersuutigineqarpoq, qummoroortaatit, radiot iputillu pinngitsooratik angalateeqqani atortuulernissaat piumasaqaatinngortinneqassasoq.
Siunnersuutigineqartut pillugit Naalakkersuisunut ilaasortaq Jens Napaattooq oqaaseqarpoq, inatsisiliorniaanarluni inatsisiliortoqartariaqanngitsoq, inatsisilu atuutsinneqalerpata aamma malinneqartariaqassasut. Tamannalu ataatsimiititaliami oqaluuserineqarsimammat naamagisimaarlugu Jens Napaattooq oqarpoq.
Imaatigut angallannermi sillimanerunissaq pillugu siunnersuutinit pingasuusunit ataaseq kisimi akuersissutigineqarpoq. Siumut sinnerlugu Inatsisartuni ilaasortap Enos Lyberth-ip siunnersuutaa akuersaarneqarpoq, Enos Lyberthep siunnersuutigaa imaatigut angallannermi sillimanerulernissamik suliniuteqarnerup aqqutissiuunneqarnissaa.
