Inaluk Brandt: Ileqqut nutaat arnat amerlanerit qaffasinnerusumik atorfeqalersissavaat

Arnat amerlanerit qaffasinnerusumik atorfinittalissappata, namminersortut suliffiutaasa inuiaqatigiillu akornanni allannguisoqartariaqarpoq. Visioboximik pilersitseqataasoq siulersuisunilu ilaasortaq Inaluk Malene Brandt taama isumaqarpoq.

Fuldmægtigi, sulisoqarnermi pisortaq, siulersuisuni ilaasortaq kiisalu nammineq suliffeqarfiutiminik pilersitsisoq.

Inaluk Malene Brandtip Nuummeersup atorfiit qaffasissut arlallit atorfigigai CV-iani atuarneqarsinnaavoq – tamannalu immikkuullarequtigaa.

Nalunaarsukkammi nutaat naapertorlugit, Kalaallit Nunaanni atorfiit sunniuteqarfiusut 700-t missaanniittut pingasorarterutaannaat arnanit atorfigineqarput. Ingammik namminersortut suliffiutaanni arnat qaffasissumik atorfillit ikittuararsuupput.

Inaluk Malene Brandt inuit sunniuteqarnerpaat akornannut inissinneqanngilaq. Namminersortulli suliffeqarfiutaanni arnat qaffasissumik inissisimasut qaqutigoortut, taassuma maluginiarpaa.

”Kalaallit Nunaanni inuit pissaaneqarnerit” qanoq inissisimanerat erseqqissarneqarpoq

 

Kalaallit Nunaanni inuit pissaaneqarnerpaat qanoq inissitsitersimanerannik misissuinermi, atuuffiit atassuteqaqatigiiffiillu nalinginnaasumik ilisimaneqartut pillugit paasissutissat aallaavigineqarput – taakkualu Inatsisartunut, Naalakkersuisunut, siulersuisunut, kattuffinnut, siunnersuisoqarfinnut, ataatsimiititalianut il.il. tunngasuupput.

Kikkut timersoqatigiittarnersut, kaffisoriaqatigiittarnersut aalisariaqatigiittarnersulluunniit imaluunniit kikkut ilaqutariinnersut misissuinermi sunniuteqaataanngilaq.

Inissitsiterinermi inuit kalaallisut, qallunaatut imaluunniit marluinnik oqaaseqartuunersut aamma sunniuteqaataanngilaq.

Namminersortulli suliffeqarfiutaasa ilarpassuisa pisortat akornanni angutit amerlanerujussuusut namminneq maluginiarneq ajoraat, taassuma nalilerpaa.

- Taakkua tamanna ajornartorsiutitut isigineq ajoraat ilimagaara. Pitsaasumimmi ingerlagaanni, sooq taava allannguisoqassava? Arnat angutillu naligiissitaanerisa iluaqutaallunilu soqutiginarsinnaanerata maluginiarneqartannginnera pissutaavoq, taanna oqarpoq.

Pisortat suliffeqarfiutaat akuersaarnerusut

Inaluk Malene Brandt suliffeqarfimmik namminersortumik Visioboximik pilersitseqataanikuuvoq, tamatumalu saniatigut Tele Greenlandip kiisalu Siorarsiorfik - Nuuk City Developmentip siulersuisuni ilaasortaalluni. 

Namminersorlutik Oqartussani, kommunini pisortallu suliffeqarfiutaanni qaffasissumik atorfillit arnat namminersortut suliffeqarfiutaanni arnanut arfilinnut sanilliullugit amerlanerunerat, suliffiup avataani suliffimmilu inuunerit oqimaaqatigiissinnissaannik isiginneriaaseq pissutaasoq, taanna isumaqarpoq.

- Suliffiup avataani inuunerup aamma isumaginissaa pisortat suliffeqarfiutaanni akuersaarneqarnerusarpoq. Nakorsiarneq, qitornanik aallerneq meeqqallu napparsimaneranni angerlarsimasariaqarneq pisortat suliffeqarfiutaanni ajornartorsiutaanngitsumik akuersaarneqarnerupput.

- Isumaqarpunga arnat amerlanerpaartaasa atorfeqarnermik saniatigut ilaquttaminnik qitornaminnillu aamma isumaginnissinnaanissartik ornigigaat, Inaluk Malene Brandt oqarpoq.

Tamannali namminersorlutik inuussutissarsiortut akornanni taama akuersaarneqartigiuaannanngilaq.

- Sulinermut atatillugu allatut eqqarsartarneq annertusiartorpoq, ima: Sulineruguit iluarnerussaaq, Inaluk Malene Brandt oqarpoq.

Ileqqut allanngortariaqartut

Naligiissitaanissamut inatsit 2013-imi akuerineqarpoq. Pisortat suliffeqarfiutaasa, siunnersuisoqatigiit isumalioqatigiissitallu siulersuisuini, Naalakkersuisut ataanni inissisimasuni, ilaasortani arnat angutilluunniit ataasiinnarmik amerlanerussuteqarnissaat inatsimmi tassani piumasaqaataavoq.

Inatsillu taanna angutit arnallu naligiissitaanissaat eqqarsaatigalugu isorineqarsinnaangaluarluni pisariaqartoq, Kalaallit Nunaanni Naligiissitaanissamut Siunnersuisoqatigiit siulittaasuat Katrine Bødker isumaqarpoq. InatsiIlu taanna sunniuteqarluarsinnaasoq, Inaluk Malene Brandt aamma isumaqarpoq.

- Arnat amerlanerusut ilaasortaaqataalernerat siulersuisut patajaallisaatigissagaat qularinngilluinnarpara, taanna oqarpoq.

Pissaaneqarneq pillugu aallakaatisassiornermi KNR DRilu suleqatigiipput

 

Kalaallit Nunaanni pissaaneqarnermut atatillugu pissutsit immikkut samminissaannut KNR DR-ilu isumaqatigiipput.


Tusagassiuuteqarfiit apeqqarissaarnertigut piareersarnermilu paasisassarsiornerminni pissarsiaminnik avitseqatigiipput. Tusagassiuuteqarfiit tamarmik immikkoortuupput arlaannaannut attuumassuteqaratik, Kalaallit Nunaannilu pissaaneqarnermut atatillugu pissutsit pillugit namminneq immikkut ilanngutassiortarlutik. 

Inatsilli sunniuteqarluarsinnaasuni kisiartaanngilaq.

Inuiaqatigiinnimi angerlarsimaffinnilu ileqqutoqqat suliffeqarfimmi angutit arnallu isumalluutigineqartarnerannut aamma sunniuteqartartut, Inaluk Malene Brandt isumaqarpoq.

Assersuutigalugu nammineq maluginiartasimavaa, suleqatini angutit qitornaminnut eqqumaffiginnittarnerinit qitornaminut eqqumaffiginninnerusarluni.

Atorfinnut atatillugu angalajuartarnikuuvunga, imalu aperineqartuartarlunga: Qitornatimmi angalaninni kiap paarissavai? Ilaqutariinni inersimasut marluulluta marlunnik meeraqaratta, taama aperineqartarnera eqqumiigisarpara, Inaluk Malene Brandt oqarpoq.

Inuttaalu suliffimminut atatillugu sapaatit akunnerani ataatsimi aallaqqanini pillugu meeqqeriviup sulisuinit upissunneqarnikuusimavoq, meeqqalli ataataat tamanna sioqqullugu sapaatit akunnerini arfinilinni aallarsimaqqammernini pillugu upissunneqarsimanani.

Arnalli angutillu amerlaqatigiit – aamma namminersortut suliffeqarfiutaanni – qaffasissumik atorfeqalersinnaassappata arnat angerlarsimaffimmi aqutsisuunissaat inuiaqatigiit ilimasuutigiunnaartariaqarpaat.

- Arnat inuussutissarsiornermi qaffasissumik atorfittaarnissaannut kiffaanngissuseqarnerulersinnaaqqullugit arnat angutillu angerlarsimaffimmi isumagisassanik oqimaaqatigiissaarnerusumik agguaqatigiittariaqarput, Inaluk Malene Brandt oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat