Imperial Oil Beaufortip Imartaani uuliasiornialerpoq

Ukiut 17-it qaangiutereerput, miserratissaagunanngilarli, Canadamiut uuliasioqatigiiffissuat Imperial Oil Beaufortip Imartaanut uteqqilerpoq. Beaufortip Imartaa Amerikap nunavittaata avannamut sineriaaniippoq.
oktobarip 25-at 2007 05:41

Imartami anorersuaqarfioqisumi Imperial Oil kingullermik uuliasiormalli uuliasioqatigiiffik alla ataaseq uuliasiornikuuvoq, tassaavorlu amerikamiut uuliasioqatigiiffiat, Devon Energy Corporation.

Tuluit nutaarsiassaqartitsiviata Reutersip tamanna nalunaarutigaa.

Imperial Oil maanna uuliasiornialerpoq, Exxon Mobil peqatigalugu uuliasiortoqarnialerami. Uuliasiorsinnanissarli akikitsuinnaasimanngilaq. Uuliasiorsinnaanissamut akuersissutit 600 millioni dollarinik naleqarput, imaluunniit koruunit 3 milliardit sinnerlugit naleqarsimallutik.

- Beaufortip Imartaani uuliaqarsinnanissaa ilimagisimanngitsuugutsigu akuersissutimik piniarsimassanngikkaluarpugut, Imperial Oil-ip oqaaseqartartua, Pius Rolheiser, oqarpoq, nangipporlu:

- Uuliasiorneruinnaavorli, piianerunanilu. Tamanna erseqqissaatigiumavara. Akikitsuinnaanngilaq, aporfissanillu ulikkaarluni. Aamma suliassarpassuaqarpugut, Pius Rolheiser oqarpoq.

Uuliap nappartamut akiata qaffakkaluttuinnarnerata, uuliamillu toqqortaateqarnissap sapernarsigaluttuinnarnerata kingunerisaanik, nunarsuatta avannaarsuani uuliasiorsinnaaneq maanna misissuiffigineqaleraluttuinnalernikuuvoq.