Immussuaq nammineq sanaaq
Takornarissat Kalaallit Nunaannut tikeraaraangamik kalaallit nerisassaataannik misiliillutik nerinissaminnut soqutiginnittaqaat. Immussuarlu Neriniartarfimmi Sarfalimmi sanaajusoq Kalaallit Nunaanni pissaritsinneqartunit sanaajuvoq. Immuk Narsaminngaanneersuuvoq akuutissallu immussualiornermi atorneqartut Daniel Greve Rasmussenip suleqataatalu Mark Linfosip pinngortitamit katersorsimavaat.
- Neriniartarfinni allani immussuit qaqutigoortut pisiarineqartarput. Uagullu eqqarsaatigisimavarput allaanerusumik suliaqarniarluta. Tassalu immussualiorsimavugut, tamannalu nammineerluta naqqaninngaanniit suliarisimallugu. Taamatut suliaqarneq nuanneqaaq, immussualiattalu piareernissaanut qaammatialuit utaqqisimavugut. Immussuaq mamalerniarlugu Kalaallit pinngortitaanit naasunik paarnanillu akoorsimavarput. Mamaliiniarnerlumi aamma pissanganarsimaqaaq, Daniel Greve Rasmussen oqaluttuarpoq.
Neriniartarfimmi immussuarmik nammineq sanaamik sassaalliuteqarneq iluatsilluarsimaqaaq. Maannalu immussuup sannaanik avammut tunisassiarinnissinnaaneq isumaavoq. Thise Mejerimi immussuaq sarfalimmi sannaaq pillugu soqutiginnippoq, immullu Danmarkimeersoq atorlugu Kalaallit paarnaanik naasuinillu akuutissalerlugu immussuarmik tunisassiulersinnaavoq.
-Kalaallit Nunaannut nittarsaassilluarnerussaaq, immussualiatta sannaa avammut niuerutigisinnaagutsigu. Kalaallimmi naasui akuutissatut atukkagut immussualiatsinnut assigiinngitsunut marluusunut tulluarluinnarput.
Immussualiatta aappaani kimmernat Kalaallillu parnai atorsimavagut, immusualiattalu aappaa Tupaarnanik,persillenik, kuanninik panertunik qeqqussanillu akoorsimavarput.Paarnat naasullu atukkagut tamaasa panertissimavagut, panertissimanngikkaluarutsigimmi immussuarmut pitsaavallaarsimassanngikkaluarput, Daniel Greve Rasmussen ukiuni sisamani Hotelip neriniartarfiani sulereersoq taama oqaluttuarpoq.
