Immiorfimmut alakkaasoqarluarpoq

Ullumi immiorfiit ulluat, Jørgen Pedersenip annertunerusumik isumalluuteqarfigisimanagu, ullumi nalunaaqutaq marlunngorluinnartoq, immiorfimmik soqutiginnillutik takornariat amerlassusaat ilimagisaaniit amerlanerulereersimapput. Soqutiginnittut akornanni ipput montørit qallunaat nunaanniit suliartortut, imerniartarfiliarniarlutik takornarianut ilannguteriataartut.

-Angalangaatsiartarpugut siornatigullu immiorfinni assigiinngitsuni takornariareernikuulluta. Misigisaq una annertuvoq. Mamartumik qanoq immiortoqartarnera nammineq takullugu minnerunngitsumillu immiukkamik ussiineq, misigisaq imaannaanngitsuuvoq, montørit ilaat unnerpoq allalu nangilluni: Imeq immiornermut atorneqartartoq paasivarput tassaasoq imeq illoqarfiup eqqaaneersoq suliareqqaarneqanngitsoq tamannalu alutorilluinnarpara. Immiukkat mamarluinnarput ussikkagullu assigiinngiiaalaarput.

Pulaartut apeqqarissaarnerat immiortuunerup alutorsaatigeqaa ilisimasaqarfigilluakkani nuannarinerpaasamilu ilaat apersuutigineqartoq nalunagu

-Tassaavormi inuuniutiga nuannarisamalu ilaat. Immiorfimmi maani immiorfipput ingerlalluarpoq nunarsuarmilu immiorfinnut muteerniusunut sanilliunneqarsinnaalluni. Immiorneq nammineq isumagisarparput. Immiugassat ukiumut arlaleriarluta Tysklandimiit pissarsiarisarpagut ilaannikkullu nammineerluta misileraajutigaluta mamassutsinik assigiinngitsunik pilersitsisarluta.

-Massakkorpiaq tupaarnaasarsunnialaartumik immiorpugut ullumilu pulaartutsinni ussiisut mamarnerarpaat, Jörg-Erich Sennhenn qungujulluni oqarpoq pulaartullu eqimattakkaartut tullii takornariartilerlugit.