Imminut toquttoqarnerata kingorna inuuneq
Qimagaasugut qanoruna taanna toqu akueriniaripput? Inuunerullu unamminartui suunuku? Ilaatigut tamakkuninnga qulequtserlugu, Simigaq G. Andersen nalunaaquttap sisamaat avillugu Qeqertarsuup katersugaasiviani imminut toquttarneq sammillugu isumasioqatigiiffiusumik oqallitsitsiniarpoq.
- Inuusuttoqatinnut oqallitsitsinissaq qangali eqqarsaatigisarnikuuara, periarfissaqartarnikuunangali. Qujanartumik illoqarfitsinnili katersugaasiviup pisortaata katersugaasiviup illutaani oqallittoqarsinnaasoq akuersaarmagu periarfissaqalerpugut, Simagaq G. Andersen nuannaaqisoq knr.gl-mut oqarpoq.
Simigaq G. Andersenip eqqarsariaasia malillugu toqu ataasiinnaavoq, naliginnaasumik toqquteqarsimagaanni, utoqqalilluni imminulluunniit toqunnikkut toqusoqarsimappat. Imminulli toquttoqarsimatillugu inuiaqatigiinni oqallittoqalersarpoq, siumut nalilersuisoqarluni, aammalu qimagaasut qanoq inuuneqarsimanerat oqallisigineqalersarluni.
Simigaq G. Andersen isumaqarpoq piffissanngortoq imminut toquttarneq pillugu ammasumik oqallittoqarnissaanut paquminartutut isigineerunniassammat.
Oqallinneq arfininngorpat unnukkut nalunaaqutaq arfineq marlunniit aallartissaaq, unnukkut aqqarnup qeqqata tungaanut.