Imminut toquttarneq pillugu pitsaaliuinermut ullorititaq

Nunarsuatsinni sumiluunniit ulloq malunnartinniarlugu assigiinngitsunik aaqqissuussisoqassaaq, matumani erseqqissarniarneqarluni, imminut toquttarneq suli ajornartorsiutaammat angisooq, aamma tamatuminnga pinaveersimatitsiniarluni suliniuteqarneq pisariaqarluinnarmat.

Naalagaaffiit Peqatigiit peqqinnissamut tunngasunik suliniaqatigiiffiata, WHO'p, qulequttatut sammitinniagaa tassaavoq, "Inuiaqatigiinni inuiannit assigiinngitsorpassuarneersunik innuttalinni imminut toquttarnermik pitsaaliuineq".

Maani Nunatsinni imminut toquttut siorna 65-it missaanniipput. Taamaalilluni nunat assigiinngitsut inuttussusaat naatsorsuutigigaanni, Nunatsinni imminut toquttartut nunarsuatsinni amerlanerpaanut ilaapput.

Imminut toquttarnermik nunarsuaq tamakkerlugu pitsaaliuinermut atatillugu ulloqartitsineq, soorunami Nunatsinni aamma malunnartinniarneqassaaq.

Illoqarfiit amerlanersaanni ikumatitalisaarluni ingerlaaqatigiittoqareerpat, timersortarfinni, katersortarfinni assigisaanniluunniit innuttaasunut assigiinngitsunik aaqqissuussisoqassaaq. Illoqarfinni arlalinni ukiup ingerlanerani pitsaaliuilluni suliniutigineqartarsimasut saqqummersinneqassapput.

Nuummi Katuami aqagu ualikkut nalunaaqutaq ataatsimiit tallimanut tamanut ammasumik aaqqissuussisoqassaaq. Tassani imminut toquttarnerup qanoq pitsaaliorneqarsinnaaneranik innuttaasut siunnersuusioqquneqassapput. Aamma taallanik atuffassisoqartarlunilu erinarsoqatigiittoqartassaaq.