Assit: Imminut toquttarneq akiorniarlugu illoqarfinni 12-ini ingerlaaqatigiittoqartoq

Imminut toquttarneq nunatsinni ukiorpassuarni ajornartorsiutigineqartoq iliuuseqarfigeqqullugu inuppassuit ullumi ingerlaaqatigiipput. Nunatsinni illoqarfinni aqqaneq-marlunni ingerlaaqatigiittoqarpoq.

Nuummi marlunngornermi ullup qeqqanit ingerlaaqatigiinnermi peqataasut politiinit 350-iussangatinneqarput.

KNR-imit oqaloqatigineqartut ilagaat Kista Kleist.

AAMMA ATUARUK Narsi pisariaqartitsinermini saaffissaaleqisimavoq

- Ikiortissamik aallerfissaqartuarnissaa inoqatitsinnullu asanninnermik tunniussinissaq pingaartittupilussuuara. Ajornartorsiuteqarnermi kisimiittoqassanngilaq. Ikioqatigiikkaanni tapersersoqatigiillunilu sorpassuit qaangerneqarsinnaapput.

Ingerlaaqatigiinnermi peqataasoq alla tassaavoq Karoline Steenholdt.

- Maaniinnissara pingaartissimavara, kammalaatigigaluara imminornikuugami. Taamaammat maannakkut maani peqatavunga.

AAMMA ATUARUK Imminut toquttarneq akiorniarlugu nuna tamakkerlugu ingerlaaqatigiinneq - assilisatit takutikkit

Imminut toquttarneq akiorniarlugu Ilulissani ingerlaaqatigiinnermi inuit 50-it missaat peqataapput. 

KNR-ip Avannaani ilanngutassiortuata oqaatigaa Ilulissani ingerlaaqatigiit tassaanerusut perorsaasunngorniat.  
Kommunip allaffiata silataanit katersortarfiup tungaanut ingerlaaqatigiittoqarpoq, katersortarfimmilu katerisimaarnermik naggaserneqarluni. Ingerlaaqatigiinnermik aaqqissuisoq Avannaatalu Kommuniani borgmesteri Palle Jeremiassen oqalugiarput.

AAMMA ATUARUK Vi kan ikke lade som ingenting længere