Imminut toqukkusuttut ikilipput
Inuit peqqissusaannik Naalagaaffiup Misissuisoqarfiata 2010-mi 2011-milu misissuinerata takutippaa, niviarsiaqqat akornanni imminut toqunnissamik eqqarsaateqartut affaannanngorsimasut, niviarsiaqqallu imminnut toqoriaraluartut 2004-miit aamma ikileriangaatsiarsimasut.
Taamaakkaluartoq nukappiaqqat niviarsiaqqallu imminnut toqunnissaminnik eqqarsaateqartartut, imminnullu toqoriaraluartut suli amerlaqaat - nukappiaqqat quliugaangata ataaseq, niviarsiaqqallu sisamaagaangata ataaseq imminut toqoriarsimasarput.
Inuusuttut sisamaagaangata pingasut arlaleriarlutik imminut toqoriaraluarsimasarput, inuusuttullu imminut toqoriaraluartut affaasa taamaaliorsimanertik allanut oqaluttuarisimanngilaat.
Inuusuttut imminut toqoriaraluartut amerlanersaat imminut toqoriaramik aalakooratilluunniit ikiaroorsimanngillat.
Inuusuttut imminut toqunniartut amerlasuut pisortaqarfimmut attaveqanngisaannartuunerat kisitsisit aamma uppernarsivaat. Taamaammat inuusuttut tassuuna sanngiiffeqartut imminut toqunniartuusinnaasut piaartumik nassaariniarnissaasa pisariaqarnera erseqqissaavigineqartoq, nalunaarusiami allassimavoq.
Imminut toqoriarnermut inuusuttut namminneq tunngavilersuutaat tassaapput sumiginnagaaneq, allanut attaveqarniarnermik ajornartorsiuteqarneq, inunnik imminnut pingaarutilinnik atassuteqarfissanik amigaateqarneq, tamatumalu nassatarisaanik inuunerliorneq, minnerunngitsumillu kiserliorneq.
Inuusuttut imminut toqoriarnerannut nassuiaat pingaarneq alla tassaavoq, inunnik toqukkut qimagussimasunik - pingaartumik asasanik, imminut toqunnikkut annaasanik - maqaasineq takorusuinerlu. Taamaalillutik inuusuttut qanigisaminni imminut toqunniartoqarneranik misigisaqarsimasut imminut toqunniartunngorsinnaanerat, inuusuttut nassuiaataasa uppernarsigaat, nalunaarusiami "Inuusuttutut inuuneq atoruminaatsoq - Kalaallit Nunaanni Inuusuttut Atugarissaarnerat 20011"-mik taaguutilimmi inerniliunneqarpoq.
Misissuineq Inuit peqqissusaannik Naalagaaffiup Misissuisoqarfiata, Ilaqutariinnermut, Kultureqarnermut, Ilageeqarnermut Naligiissitaanermullu Naalakkersuisoqarfiup aamma PAARISA-p suleqatigiinnerisigut Nunatsinni sumiiffinni assigiinngitsuni meeqqat atuarfiini aqqaneq-marlunni 9. aamma 10. klasseni ingerlanneqarpoq. Persuttaasarneq, ilaqutariinni qaninnerpaani atornerluinermik ajornartorsiutit, kinguaassiutitigut atoqatigiinnermik misilittakkat, kiisalu kinguaassiuutitigut atornerluinerit aamma misissorneqarput.
