Imminut pilersorsinnaasariaqarpugut
Biologit kaammattuutaat malillugit ukiorpassuarni aalisagartassiisarpugut, aamma sumiiffinni aallisartut biologit isumaqatiginngikkaluarpatigilluunniit. Tamannalu piffissami aggersumi allanngortinneqassaaq, inuit ilisimasaat paasisallu assigiimmik pingaartinneqassallutik.
-Aalisartut misilittagaasa tusaaniarneqartarsimannginnera kukkunerujussuusimavoq. Taakkumi angalajuaannartuupput Nunattalu imartaani sumiiffinni aalajangersimasuni qanoq aalisagaqartiginersoq taakku ilisimasaqarfiginerpaavaat. Taamaammat aamma biologit siunnersuisarnerat assigalugu tusaaniartassavagut. Taamaaliornikkut immaqa aalisagartassiissutinik eqqortunik aalajangersaallaqqinnerulissaagut tamanut iluaqutaasussamik, Karl Lyberth knr.gl-imit apersorneqarluni oqarpoq.
Nunatta sineriaani kangerluppassuaqarpoq misissorneqarsimanngitsunik, taakkunanilu sunik aalisaqarnersoq kialluunniit ilisimasaqarfiginngilaa. Tamanna siunissami qaninnerpaami misissortariaqarparput, taamaalilluta aamma qularnaatsumik oqarsinnaalissaagut aalisakkanik amigaateqarnerluta imaluunniit naatsorsuutigisatsinnit amerlanerujussuarnik aalisagaateqarnerluta.
-Takorloorsinnaasatsinnit suli amerlanerujussuarnik pisuussuteqarnerput uanga ilimagaara. Tamannalu ukiuni tullerni misissuiffigissavarput, aamma Nunatta aalisartoqarfissuartut suli ukiuni amerlaneruni ingerlanissaanik immaqa qulakkeerisinnaassaaq. Pissutsit iternga tikillugu misissunngikkutsigit aalisartut inuiaqatigiillu ajutoorutissaannik tuneratarsinnaavagut. Aalisarnermit isertitavut ukiorpassuarni inuussutigaagut, nunalu tamakkerlugu, aamma najugaqarfinni mikinerusuni, pitsaasumik qularnaatsumillu suliniuteqarneq ingerlatiinnassavarput, Karl Lyberth oqarpoq.