Imminut napatissinnaalernissaq siunissaavoq
Qeqqata Kommuniani ukiorpassuarni anguniagarineqarpoq sapinngisamik kommunip imminut napatissinnaalernissaa. Tamanna anguniarlugu assigiinngitsunik suliniuteqartoqarpoq, tamakkuuppullu nunat assigiinngitsut aningaasaateqarfianeersut inuit arfineq pingasuusut Sisimiuni pulaarnerminni isiginiarsimasaat.
-Kommunip suleqatiginerani aningaasaateqarfimmiit Villum Fondimiit isiginiarsimavarput imminut napatissinnaalernissaq annertusarniarlugu alaatsinaattoqarnerulernissaa. Kommunip seqernup qinngorneranik uunnaaviit, aammalu minnerunngitsumik illup kiassaruminartup sananeqarneratigut takutissimavaat imminut napatissinnaalernissamut anguniagaq anguneqarsinnaasoq, naak kommuni mikigaluartoq nunami isorartuumi inissisimasoq, taama Villum Fondimeersoq Arne Villumsen oqarpoq.
Suliniutit allat aamma aallartisarneqareerput, piviusunngortinniarneranullu nunat assigiinngitsuniit aningaasaateqarfiit aningaasatigut ikiuukkumallutik aaliangiussissappata suliniutit piviusunngortinniarnerannut aningaasat assut iluaqutaasinnaassapput. Iluarsartuullugu pilersaarusiaq ataaseq naammassereerpoq, ingerlateqqinnissaalu massakkut utaqqiinnarparput.
-Sisimiuni umiarsualiorfik aaqqissuullugu iluarsartuutereerparput. Massakkut Nutaaliorfik assigiinngitsunut siunertanut atorneqarnissaminut piareerpoq. Illoqarfimmi friskoliusoq tassani atuartitsinissamut akuerineqarpoq, neriuutigaarpullu siunissami sammisassaqartitsinerit assigiinngitsut arlaqartut tassani ingerlanneqartarumaartut. Tammaarsimaartitsinerit misigisassaqartitsinermullu sullissivik aamma periarfissat nutaat ilagisinnaavaat. Takorluuisinnaanerup kisimi killilerpaa umiarsualiorfiup iluarsartuunneqarnikup sumut atorneqarsinnaaneranut. Tamakku tungaatigut Qeqqata Kommunia nutaaliullaqqippoq, tamakkuuppullu nunat allat aningaasaateqarfiisa ilakkuminarunartilerneranut pissutaasut ilagisaat. Maanga uteqqinnissaat uanga ilimagilluinnarpara, neriuutigaarpullu kommuni taakkunaniit isumagineqarumaartoq, taama Arne Villumsen oqarpoq.
