Imminortoq ataasiinnaavoq

januaarip 28-at 2005 06:01

Ilulissani inuk ataaseq ukioq kingulleq imminorpoq, ukiullu 23-it ingerlanerini imminortoqartarnikkut ikinnerpaaffiusoq, Sermitsiaq ullumi saqqummersoq allappoq.

Tamatuma takutippaa kommunemi ukiuni siuliini kisitsisit qaffasittuaannarsimasut illuanut saakkiartulersimanerannik.

Imminortoqartarnera pinaveersimatinniarlugu kommuni suliniuteqarluarsimaqaaq. Ilulissani politeeqarfiup pisortaa Bent Heisselberg Sermitsiamut oqarpoq neriuutigalugu suliniuteqarsimanerup kisitsisit appariaateqarsimanerinik takussutissarissagaa.

Pitsaaliuinermik suliniarnerit meeqqat atuarfiini atuartunut sammitinneqartarsimavoq, suliniarnerlu inuusuttunut pinerluuteqartarsimasunut aamma sammitinneqartarsimavoq.

Pitsaaliuinermik siunnersortip Ilulissat kommuneaneersup Jonna Sandgreenip erseqqissaatigaa imminortoqartarneranut tunngatillugu suliniutit sallersaajuarallassasut, kisitsisilluunniit appariartoraluarpata.