Imminortartut ikilisinneqarsimapput
Ilulissani kommunep suliniuteqarnerata kingunerisaanik illoqarfimmi imminortartut iileriarujussuarsimapput. Ingammik atuarfimmi atuartut akornganni inissisimasumik oqaloqatiginnittartumik atorfinittitsisoqarnera annertuumik sunniuteqarluarsimavoq.
Ilulissat Kommuneata 2003-mi Astrid Olsen atuartut akorngannut inissillugu atorfinitsippaat, taamaasillutik inuusuttut meeqqallumi imaaliallaannaq iserfigeriarlugu ajornartorsiutitik pillugit oqaloqatiginnissinnaanngorsimapput. Tamatumalu kingunerisaanik imminortartut ikileriarujussuarsimallutik.
2003mi Ilulissani arfinillit imminorsimapput, ukiunilu siuliini ukiumut arfineq-pingasut inuusuttut imminortarsimallutik.
Ukiunili kingullerni marlunni ukiumut ataaseq imminortarsimavoq.
-Nalunaarsuutinik sanasarpunga ukiorlu siulleq imminornissamut eqqarsaateqarsimasut atuartorpassuit oqaloqatigisarsimavakka taava assiginngissutaanik nammineerlunga takusaqarsinnaavunga ukiut tulliani pisimasunik taamatut eqqarsaateqarlutik imminornissamik eqqarsaateqarlutik annertuumik ikileriarsimammata, Astrid Olasen oqarpoq.
Nunatsinni atuarfiit tamarmik inummik ataatsimik marlunnilluunniit atuarfinni oqaloqatiginnittartunik atorfinittitsisariaqaraluarpat?
-Annertoorujorujussuarmik innersuussutigisinnaavara taanna isumaqarama taamatut atorfeqartitsinermi inissisimaneq atuarfiup atuartullu iluani atuartut akornganni inissisimaneq taanna assorujoq oqilisaataasoq saaffiginninniarnermut meeqqanut.
Astrid Olsen aamma oqarpoq kisimiilluni oqaloqatiginnittartuuneq artornarsinnaammat inuit marluk atorfinitsinneqartariaqaraluartut. Aammalu misigisanik imaarsaaqateqarnissamut periarfissiinissaq pingaaruteqarluinnartoq.
