Imminortarneq ilisimatusarfiginiarneqarpoq
Ilisimatuup Nunavummi illoqafiit pingaarnersaanni Iqalunni najugallip nunani issittuni najugalinni inuiaat inuit akornanni imminortoqarpallaartarnera ilisimatusarfiginialerpaa.
Nunatsinni Alaska-milu taama imminortut amerlatigisarnerannut suna peqqutaarpiarnersoq ilisimatuup Jack Hicks-ip neriuutigaa paasisaqarfigiumaarlugu.
Imminortarneq pillugu naatsorsuinerit tunngavigalugit paasinarsisimanerarneqarpoq, imminorneq piffissap ingerlanerani allanngorartumik akulikillinerusartoq.
Alaska-mi imminorneq 1960-ikkut aallartilaarneranni atuussimaqaaq, nunatsinnilu 1970-ikkut 80-ikkullu ingerlaneranni atuussimaqaluni. Kingorna Nunavumi sakkortusiartulersimavoq Canadallu nunaata ilarujussuanut siaruaatilersimalluni.
Nunavimmi imminortut amerlassusaat allanut sanilliullugit qaffasinnerusimapput, Nunavummullu sanilliullugit 50 procentimik qaffasinnerusimallutik. – Taakani nunaqqataasut Cree-indianerit Canadami najugalinnut sanilliullugit imminornermik nalaataqannginnerpaasimasut oqaatigineqarportaaq.
- Takussutaasinnaasut arlallit atorsinnaapput, sumiiffikkaaraluni sanilliussineq najoqqutarisarlugu ukiuni kingullerni susoqarpiarsimanersoq paasiniarneqarsinnaavoq, Jack Hicks oqarpoq.
