Imminornermut tunngasut qitiussapput

Imminorneq imminornissamillu eqqarsarneq sukumiisumik samminissaat psykologit sinerissami sulinerminni takusatik tunngavigalugit aalajangiuppaat. Taamaattumillu Dansk Psykolog Foreningip nunatsinni ilaasortaasa 35-it amerlanersaasa ukiumoortumik ataatsimiinnerminni suleqatigiissitaliorput. Psykologillu pikkorissarnissaat tulliuttut imminornissamut eqqarsartut, qimagaasut attuumassuteqartullu qanoq sullinneqarnissaannut tunngasuussapput.

Psykologit aamma inatsisitigut illersorneqalerumapput.

Psykologit qaffasinnerusumik ilinniaqqissimasut, kandidatinngorsimasut peqatigiiffimmi ilaasortaapput. Kikkut psykologitut imminnut taagorsinnaanersut inatsisisigut qulakkeerneqassasoq eqqartorneqarpoq, taamaalilluni psykologiviit sullitallu illersorneqarsinnaalissammata.

Psylogogitut ilinniaqqillutik cand.psych.-imik imaluunniit cand.pæd.psych.-imik allagartaqalersimanngitsut sullitaat sullinneqarnertik ajorsimappat ullumikkut naammagittaalliorsinnaanngillat, tamanna inatsisitigut tunngavissaqanngimmat.

Nunatsinni psykologit peqatigiiffianni siulittaasuuvoq Karen Marie Nathansen, tulleralugu Ida Andersen, siulersuisunilu ilaasortaallutik Jonna Ketwa, Annette Broberg Susan Hornbøll-ilu.