Imminornermik eqqugaaneq sakkortooq

Ukiuni kingullerni arlaqalersuni, nunatsinni imminortartut ukiumut agguaqatigiisillugu 50-iusartut, ulloqeqqanut radioavisimi oqaatigivarput.

Imminornermik eqqugaasimasut, ilaatigullu ilaqutariittut atugaat, imminortoqarsimanerata kingorna inuunerannut ajorluinnartumik sunniuteqartarpoq. Inge Poulsen, Nuummi najugaqartoq, qanigisaminik imminornikkut annaasaqarsimavoq, misigisimasanilu ima oqaluttuarai:

- Annaasaqarsimatilluni tupannartorujussuuvoq, eqqarsariaatsimut aamma attuisarmat. Eqqarsarsinnaaneq killeqartorujussuanngortarpoq, allaat iliuuserisinnaasat suliffigisimasallu, ilami susinnaajunnaavittutut misigisimatitsilersarpoq. Kisima taamatut misigisaqanngilanga ilami aamma meeqqakka taamatut misigisaqarput. Panima angajulliup atuarnini unitsiinnartariaqarsimavaa, uattorpiaq eqqarsarsinnaassutsikkut inuuniluttarnermillu misigisisaqartarami.

Inge Poulsen-ip meeraasa affarmik qatanngutaat, ukioq kingulleq imminorpoq, pisimasorlu Inge Poulsen-ip meeraasa namminerlu, ulloq manna tikillugu timikkut tarnikkullu naalliuutigisarpaat. Allaat Inge Poulsen, qaammatini qulini sulisinnaasimanngilaq.

- Tupangaarnerup kingorna eqqarsarsinnaaneq atorsinnaajunnaarami, taamaalilluni kinguneraa sulisinnaajunnaarneq. Aamma kamassaqarneq aliatsajanerlu meerartama misigisarpaat, Inge Poulsen naggasiivoq.

Imminortoqarsimatillugu qanigisaasut ikinngutaasullu eqqorneqartarnerat aqagu radioavisimi aamma sammineqaqqissaaq, tamatumuuna pinaveersaartitsinermi suliallit nakorsallu oqaloqatigineqassallutik.