Imminorneq pinaveersaartinniarneqarpoq

Imminortarnerup pinaveersaartinnissaa pillugu Nuummi suliniuteqarneq ingerlalluarpoq.

Sapaatip akunnerini siullerni pingasuni ikiorneqarnissamik pisariaqartitsisut 37-t kommunimut saaffiginnissimapput.

Maajip qaammataani imminorsimasut arfinillit tunngavigalugit, upalungaarsimanissaq pillugu ataatsimiititaliap SSSPK-p siulittaasuata, Vibeke Møller Jensenip, SSSPK ataatsimiigiaqquaa.

Vibeke Møller Jensen Nuup Kommueanni isumaginninnermi pisortaavoq.

Maajip qaammataa ilanngullugu Nuummi imminorsimasut qulingiluaasimapput. Imminortarnerullu pinaveersaartinnissaa pillugu oqarasuaammik vagteqarfiusumik maajip 19-ianni pilersitsisoqarpoq.

Nuup Kommunalbestyrelsiani ilaasortat pinaveersaartitsinermik suliallit maannamut misilittagarisimasaat pillugit paasissutissinneqaleruttorput.

Imminortarnerup pinaveersaartinnissaa pillugu oqarasuaat atorluarneqartoq malunnarpoq. Maannamut saaffiginnissimasut 37-usimapput, oqarasuaatillu ammarneqarnerata kingorna sapaatip akunnerani siullermi saaffiginnnittut katillugit 17-iusimapput.

Saaffiginnittullu kikkuuneri qimerlooraanni takuneqarsinnaavoq tassaasut angutit inuusuttut ajornartorsiuteqalersimasut, anaanat meeqqaminnik inersimasunik isumaaluttut, inuit qanitaminnik imminortunik misigisaqarsimasut, inuillu tarnip pissusaannik ilisimasalimmik oqaloqateqarnissaminnik pisariaqartitsisut.

Nuup Kommunea imminortarnerup pinaveersaartinnissaa pillugu sulialimmik atorfinitsitsisimavoq, ulluinnarni sianerfigineqarsinnaasumik. Isumaginninnermik suliallit nammineq kajumissutsiminnik sapaatip akunnerisa naanerini sulisarput.

Nuup Kommunea nammineq piumassuseq tunngavigalugu sulerusuttumik suli

nassaarsinnaasimanngilaq.

Ikiunissaq pillugu piareersimasumik oqarasuaat sianerfigineqarsinnaasoq normua tassaavoq 55 57 38.