Imminorneq Nunavimmi ajornartorsiutaavortaaq

Canadami Nunavimmi imminorneq ukiorpassuarni annertuumik nunatsinnisulli ajornartorsiutaasimavoq, iliuuseqarfigiuminaassimalluni. Massakkulli Nunavimmi inuusuttut pinaveersaartitsinermik namminneerlutik aallartitsisimapput, suliniullu ingerlalluartoq Nunavimmi inuusuttut Inatsisartuanni siulittaasoq Canadamilu ICC-p inuusuttai sinnerlugit ataatsimeersuaqataasoq, Kuujjuarmiu Jonathan Epoo oqarpoq. Nunavimmimita imminortarneq qanoq annertutigaa, Jonathan Epoo akivoq:

- Nunavimmi imminortoqartarnera ulluinnarsiutaavoq, 1977-imiit maannamut naatsorsuisoqartalermalli paasineqarnikuuvoq ukiumut inuit 15-it 20-llu akornanni imminortartut, Jonathan Epoo oqarpoq.

Tamanna pillugu Nunavimmi inuusuttut Inatsisartui pinaveersaartitsilluni suliniummik ukiunik pingasunik sivisussuseqartumik siorna aallartitsisimapput.

- Suliniut angalanermik aallartippoq, tassa inuusuttut arfinillit namminneq qaanniatik angallatigalugit Nunavimmi inoqarfiit tamaasa ukiut pingasut ingerlaneranni tikinniartussaavaat, arlallillumi tikereerlugit. Inuusuttut tikisaminni inunnik katersortitsisarput imminortarnermillu ajornartorsiummut suliniarnerminnik paasisitsiniaasarlutik. Imminorneq annertuallaaqimmat, oqaaseq taanna pinaveersaartitsinermut atsiunneqanngilaq, atsiunneqarlunili “Inuuneq inuuneralugu”, Jonathan Epoo oqarpoq.

Inuusuttut qaannamik angallateqarlutik inoqarfinnut angalasut Kuujjuaraapimmit Akulivimmut 500 kilometerit manna ingerlaareersimavaat.

- Inuusuttut tikitaminnut pigaangamik peqqissumik inuuneqarnissamut, kulturimik pingaartitsinissamut inuunermillu eriagisaqarluni inuunissamut kaammattuisarput, tamannalu tikinneqartunit tamanit assut tigulluarneqartarpoq imminortarnerlu nipangiusimaneerulluni, Jonathan Epoo oqarpoq.

Nunavimmi imminornermik pinaveersaartitsilluni suliniarnermi imminornerup kingunipilui sammineqartanngillat peqqissumilli inuunerup naleqassusia siammarterniarneqarluni.

- Imminornerup ajornartorsiutaanera isiginngitsuusaarnianngilarput ajornartorsiulli illuatungaanut saatsillugulusooq qaammarsaarusulluta, Jonathan Epoo oqarpoq.

Nunavimmi imminorneq pinaveersaartinniarlugu suliniarnermik aallartitsisuuvoq Nunavimmi Saputiit Youth Association, Nunavimmi inuusuttut inatsisartui, tassanilu Jonathan Epoo siulittaasuuvoq. Suliniummut ilaatigut peqataapput Makivik Corporation. Saputiit nittartagaat tassaavoq: www.saputiit.ca