Imminorneq akiorniarlugu immikkut iliuuseqartoqalerpoq
Nuummi imminorsimasut ukioq manna arfineq-pingasunngoreerput. Taamaattumik pinaveersaartitsinermik suliaqartut ippassaq ataatsimiinnerminni immikkut ittumik iliuuseqarnissartik aalajangiuppaat.
Nuummi arnat pingasut angutillu tallimat ukiup qaammataani siullerni imminornerisa kingunerisaanik pinaveersaartitsinermik suliallit: Inunnik Isumaginnittoqarfik, Peqqinnissaqarfik, Atuarfiit, Politiit Pinerluuteqarsimasunillu nakkutilliisoqarfiup suleqatigiiffiat SSSPK ippassaq ataatsimiinnermi aalajangerpoq, imminorneq akiorniarlugu sukumiinerusumik suliniartariaqalerlutik.
SSSPK-p siulittaasua Vibeke Møller Jensen oqarpoq, ulluugaluarpaat unnuaagaluarpat saaffiginnittoqarsinnaanngortoq.
SSSPK-p ataatsimiinnerani siunertat pingaarnersaraat pinartoqartillugu piareersumasussanik pilersitsinissarput; Imminornissamik eqqarsaateqartut, ilaqutaasut qanigisallu qaqugukkulluunniit saaffiginniffigisinnaasaannik.
Imminornerit pisartut amerlaqaat, ataatsimiititaliamilu ilaasortanit assut ernumassutaapput. Sukkanerpaamillu ikiuigasuartussanik pilersitsivugut, Vibeke Møller Jensen oqarpoq.
Politimestereqarfiup arajutsisimanngilaa imminornerit arlalissuit piffissami sivikitsumi pisimanerat.
- Assut alianarpoq inuk imminut toqunnissani toqqaraangagu. Imminornerli ajornartorsiutit qaangerniarlugit aqqutissaanngilaq, pingaartumik sugisat qimagaasullu eqqarsaatigalugit, Politimester Steen Thomsen oqarpoq.
Nuummi politiit nalunaarput imminortut februaarimi marluusut maajimilu arfiniliusut. Ukiui assigiinngeqaat, 16-iniit 55-inut ukioqaramik.
Imminornissamik eqqarsartunut ilaqutaasunullu saaffiginniffiusinnaasoq oqarasuaat ulloq unnuarlu ammasartussaq ima normoqarpoq: 55 57 38. Taannalu atulereerpoq.
