Imminorlutik qaartartumeerisartut ilaqutaat Taliban-it akileraat

Afghanistan-imi ilaqutariit Nunat killiit Afghanistan-illu sakkutuui akiorniarlugit imminorlutik qaartartumeerisartunik annaasaqarsimasut, nunami aqutsilersunit, Taliban-init, nunaminertamik aningaasanillu tunineqarnissartik naatsorsuutigisinnaalerpaat.

Amerikamiut tusagassiorfiat AP taamatut allaaserisaqarpoq.

Imminorlutik qaartartumeerisarnikut ilaqutaasa arlallit ataatsimeeqatigineranni, Taliban-it nunami namminermi ministeriata, Sirajuddin Haqqani-p, tamanna neriorsuutigaa.

Illoqarfiit pingaarnersaanni Kabul-imi akunnittarfmmi Intercontinental-imi ataasinngormat ataatsimiinnermi Haqqani-p "imminnut pilliutigisimasut" nersorniarpai. Taliban-ip sorsuttartui imminorlutik qaartartumeerisarnikut taamatut eqqaaniarlugit.

Tamakkua Haqqani-p "islam-ip nunallu sapiitsuliortuisut" suaarutigai. Ataatsimiinneq naammassillugu ministerip ilaqutariit tamaasa immikkut Afghanistan-ip anigaasaanik 10.000 afghani-nik tuniorarpai. Taakkua 715 koruunit missaannik naleqarput. Tamatuma saniatigut ilaqutariit tamarmik nunaminertamik tunineqarnissaat taassuma neriorsuutigaa.

Nunamut namminermut ministereqarfimmiit marlunngormat tweet-imi tamanna oqaatigineqarpoq.

Tweet-imi takuneqarsinnaavoq ataatsimiittarfimmi inunnik ulikkaartumi Haqqani-p ilaqutaasut eqitaarai.

Taliban, amerikamiut nunanillu killerneersut sakkutuutik aggustimi nunamiit aniatimmatigit pissaaneqalersut, nunat taamat torersumik politikkikkut attaveqarfigilerniarsarigaluarpaat, nunalli amerlanerit naalakkersuisunngortut akeriuminaatsippaat.

Ukiuni 20-ni amerikamiut iligisaasalu Afghanistan-ip sakkutuui peqatigalugit Taliban akiornikuuaat, upperluarniartullu imminorlutik qaartartumeerisarnerit aqquserngillu sanianniit qaartartumeersiarnerit akissutinnaarinikuullugit.