Imminoriarsimasoq: "ikioqqugitsi periarfissaqarpusi!"
Ikioqqussaasi !
Periarfissaqarpusi !
Aila Kristensen-ip inuusuttoqatini taamatut kaammatorpai.
Aila Kristensen inuusuttuarannguulluni imminoriarpoq ilaqutariit iluanni akisussaaffimmik tigumiarnikuulluni, qaangeramiuk.
Aila meeraalluni angajoqqaani avimmata, Aila-mut inuuneq artornarsivoq. Ailap angajoqqaavi imerajuttuupput, taamatumalu kingunerisaanik Aila ilaqutariit iluanni nukittuutut inissisimalerluni. Qatanngutini isumagilerpai, angajoqqaanilu paaralugit, ilaqutariillu ajunnginnissaat anguniartuaannarsimallugu.
Ailap anaanaa imerajuttutut katsorsartimmat imerunnaarlunilu, imigassamik atuisuunerup nalaani misisigisamat oqimaatsut , Aila-mut utersaarput. Ilaqutariinni akisussaaffik anaanaasup tigusinnaanngormagu Aila nukillaarpoq migisissutsimigut ulikkaartoorluni, ilaqutariit iluanni imigassamik atuisuunerup nalaani nukittuniarsimanini pillugu artorsarsimanermik. Tamatuma kingunerisaanik misigissutsit oqimaatsut Ailap kisimiilluni pigivai, avatangiisiminut takutinniarlugu suli nukittugami.
Nukiilli tamaanga killeqarput, Aila ilaquttani avatangiisinilu tupatsillugit imminoriarpoq. Ailap imminoriarnerata kingorna angajoqqaavi qatanngutai ilaqutai kammalaataalu Aila-mik ikiuupput, taakkualu Ailap imminoriarsimanera ammasumik oqaluuseralugu.
Aila imminoriarnermi kingorna tarnip pissussaannik ilisimasalimmik Droning Ingrids Hospital-imi oqaloqateqartarpoq, taassuma saniatigut imigassamik atornerluisut katsorsartarfianni Qaqiffimi inuusuttuaqqat katsorsarneqartanerat ingerlappaa, sakkussaminik katersuiffigilluakkaminik, taassumalu saniatigut imerajuttut katsorsartarfianni Qaqiffimmi katsorsartilluni, Aila Kristensen oqarpoq. ”misigissutsit pillugit imminut suliariuarpunga ullut tamaasa” Aila Kristensen oqarpoq.
”Inuusuttut imminornissaminnik eqqarsaarteqartut imminoriarsimasulluunniit IKIOQQUSSAPPUT pigiinnarnagit nammineq!” Aila-p inuusuttoqatini siunnersorpai. Ikioqquneq artornarsinnaagaluarpoq, alloriarnerli siulleq tigugaanni, inuusuttut paasissavaat ikiuerusuttut amerlammata. Inuusuttoq imminornissamik eqqarsaateqartoq oqaloqatissaqanngitsorlu Paarisap imminornissamik eqqarsaateqartut oqarasuaatikkut saaffiginnittarfiat innersuuppaa.
Meeqqat Inuusutullu oqarasuaatikkut saaffiginnittarfiat 134 ullut tamaasa unnukkut arfineq marluniit qulit tungaanut sianerfigineqarsinnaavoq, kinaassutsimillu taasinani siunnersortittoqarsinnaalluni. KNR-ip nittartagaani KNR naggat GL-imi saaffigineqarsinnaasut takuneqarsinnaapput.
