Imminnut ikuallallutik annanniartarput

Arnat neriuutissaarullutik imminnut ikuallattartut, CNN illoqarfimmit Heratimit ilanngutassiivoq.

- Sooruna taamaaliortunga? sooruna taamaaliortunga? Sad Gul 18-iinnarnik ukiulik qiasoq ilanngutassiami tusaaneqarsinnaavoq. Timaa nimeqqavoq, talii sakiaa naava uppataalu ikuallassimasut nimerneqarsimallutik.

Sad Gul angajoqqaaverunneruvoq, aqqanilinnarnillu ukioqarluni angummut utoqqasaamut katissimalluni. Piitsuungaarami iffiamilluunniit pisinissaminut akissaqanngilaq. Uia ikiaroortartuuvoq. Sad Gulip uini ikiaroortarunnaarseriarsimagaluarpaa iluatsinnaguli. Neriuutaarukkamilu imminut ikuallassimalluni.

Sad Gulip amiata ikuallanneruffiata nalaa amermik timaani allamit peersilluni taarserniarlugu, Dr. Ghafar Khan Bawar, nakorsiartarfimmik aqutsisoq, oqaluttuarpoq. Dr. Bawar naapertorlugu arnat iminut ikuallakkaangamik imminnut toqunniartanngitsut oqaatigaa, arnalli neriuutaarunnertik taamatut takutittaraat oqarluni. Qaammatini arfineq pingasuni kingullerni iminnut ikuallassimasut 80-it Dr. Bawar-ip passussimavai.

Arnat illersorneqarnissat eqqarsaatigalugu, Afghanistan-imi nutaamik inatsimmik qanittukkut atuuttoqalerpoq. Illoqarfillu Herat, aatsaat pernaammik arnamik unnerluussisuuneqalersimavoq, angutinik nuliaminnut nakuusertartunik eqqartuussisarnissamik sulissutiginnittussamik.

Unnerluussisuunerli, Maria Bashir-ip sulissutiginnilernissaa nuannarineqarpallaarsimanngilaq arlaleriarlunimi pinerleerianit ajortumeerniarneqartarsimagaluarpoq, qanittukkullu qaartartumeerneqariaraluarluni, saassussinerup kuingorna sms-imik nassitsippoq angutit eqqartuunneqartarnissaannik suliniutini unitsissagai.

Arnanik illersuiniarluni sullissinini unitsinniarnagu CNN-imut Maria Bashir oqarpoq.