Imminnuinnaq eqqarsaatigisut

Naatsukullammik oqaatigalugu: Inuit taakku imminnuinnaq eqqarsaatigisuupput, Jens B. Frederiksen allappoq. Ineqartut akiliiumajunnaaraangata, sanilii, ineqartullu allat, akiitsorineqartunik akiliisarmata.

- Ilami inimik attartortoq akiliinngitsooraangat akiitsui allanut tuttarput. Aamma inissiamut akiliisinnaanngitsoq anisitaangaagat asserluinnaanik pisoqaqqittarpoq. Tassami inissiap iluarsaanneqarnera allat akilertariaqalertarpaat, inissiarlu inuttaqannginnerani aningaasartuutit allat akilertarpaat, Jens B. Frederiksen naqissusiivoq.

Aamma inigisaminnut akiliisinnaagaluarlutik akiliiumaneq ajortut inigisaminnit anisitaasut Jens B. Frederiksenip soqutigivallaanngilai. Taakkumi anisitaangaagata akeqanngitsumik inissinneqaqqittarmata.

- Tassami anisitaasimasut inissinneqaqqittariaqartarnerat akiliisinnaasut allat aamma akilertarpaat. Inissiammi akiliisinnaanngitsunit atorneqartut nalinginnaasumik inissiatut atorneqarsinnaasuuppata inissiaateqarfiit isertitaqarnerulernerinik, inissamullu utaqqisut ikilinerinik, kinguneqarsinnaammat. Tassa inigisamut akiliiumanngitsut akiitsui allat akilertariaqaleraangamikkik imminuinnaq eqqarsaatigisutut taasariaapput. Jens B. Frederiksen naveerserpalaarluni ippassaq taama allaaserisaqarpoq.