Immikkut siunnersortut tamat oqartussaaqataanerat nukittorsarlugulu sanngiillisissinnaavaat

Naak taama aallartinnerliulaaraluartoq ilaatigut Transperancy Greenlandip isuma tapersersorpaa.

Aamma Julie Rademacher oqaloqatigaarput,  politikeriusimavoq sivikitsumillu Aleqa Hammondimut siunnersortaasimalluni.

Taanna isumaqarpoq immikkut siunnersortit attaveqatigiinnermut iluaqutaasinnaasut, aamma politikkikkut sulinermi, naalakkesuisorlu pisortaqarfiit akulerutinngikkaluarlugit tapersersorlugu.

- Taamaalilluni iluaqutaasinnaavoq, politikkikkut aqutsineq nukittorsarneqarsinnaavoq, innuttaasunut attaveqarneq ilanngullugu. Politikerip isumaanik itisilerisinnaalluni.

Julie Rademacher oqarpoq, ukiorpassuarni immikkut siunnersortit suleriaasiannik soqutigisaqarsimasoq.

Ilanngullugulu oqarluni aamma pitsaasuujuaannanngitsoq naalakkersuisoqarfiit pisortaat politikkimi sulianut akulerutsippallaarnissaat.

Transperancy Greenlandip siulittaasua Anders Meilvang aamma isumaqarpoq, immikkut siunnersortit iluaqutaasinnaasut naalakkersuisumut nukittorsaataasinnaagunik.

Taamaattumik aamma isumaqarpoq immikkut siunnersorti naalakkersuisumut tapersersortitut atorneqarsinnaasoq, pisortaqarfinnit naalakkisaartinneqannginniassammat.

Meilvangilli atorfiit inuttarsarsiuunneqartannginnissaat unammillernartutut isigaa.

- Ajornartuuvoq aaqqiivigiuminaallunilu, inuttassarsiuunneqartuaannarneqartariaqarnerat piumasaqaatigissagaluarparput. Inuttarsarsiuullugit, ammasumik sammillugit, piukkunnarnerpaallu atorfinitsillugit. Kisianni inuit tatigisat imminermisullu politikkikkut eqqarsartaasillit piumaneqarput, taamaattumik soorunami immikkut toqqaasariaqartassaaq.

Tranperancy Greenlandip siulittaasua taamaattumik isumaqarpoq naalakkersuisunut ilaasortat immikkut akisussaaffeqartut pitsaanerpaat atorfinitissallugit ikinngutiginerpaasaanngitsut.

- Tassa ajornakusoorsinnaavoq  massakkut naalakkersuisuusut pissaanermik atuinerat takugaanni. Inuit immikkut toqqartaramikkit, parteeqatigineri pillugit piginnaasaat pivallaarnagit. Tassa taanna annilaangatigineqarsinnaasoq. Aallaavigisariaqarporli politikikkut nukittorsaataasinnaammata.

Anders Meilvang oqarpoq. Erseqqissarlugulu nammineq isummani malillugu politikkikkut nukittorsaataanera pitsaasuusoq.

Rademacherilli immikkut siunnersortinik atorfinititsisarneq ajornartorsiutinik ersarissunik nassataqarnerarpaa.

- Isornartorsiutigivaa assersuutigalugu sorujuiaataasinnaammata politikerit tusagassiortullu akornanni naggataagullu innuttaasunut.

- Tassa uattut ittumut, maanna oqaloqatigineqarpunga takisuuliortarlunga, taava naatsunik takorlooruminartunik politikerinit nalunaaruteqartoqartalissaaq, siunnersuuterpassuit imaat paasiuminarsarlugit.

Jonas Løvschall Wedelip ilanngutassiaa Erna Lynge'p kalaallisut suliaraa.