Immikkut pisassiisoqassanngilaq

Uummannami aalisartut pisassatik tamakkereerpet Ilulissanilu aalisartut kingulliugallartumi ullumi tunisissapput.  Politikerit aalisartullu immikkut pisassiisoqarnissaa kissaatigaat, Naalakkersuisulli immikkut pisasseeqqilersaanngillat.

Uummannami Qaleralinniat Peqatigiiffiat piumasaqarpoq 1.500 tons-inik ukiup sinneranut pisasseeqqitoqassasoq.

- Ukiormanna aalisakkat akigissaarnerugaluarput. Illuatigut aningaasartuutit qaffariarujussuarput ileqqaarsinnaanerigaluaq pinngitsoortillugu, Qaleralinniat Peqatigiiffianni siulittaasoq Karl Markussen oqarpoq.

Qaasuitsup Kommuniani borgmesteri Jess Svane aamma immikkut pisassiisoqarnissaanik piumasaqarpoq kommunerujussuarmi suliffissaaleqisoqalernissaa aarleqqutigigamiuk.

Qeqertarsuulli tunuani aalisartut piumasarisimavaat pisassat 200 tons-it decemberimut nuunneqassasut taamalu aalisarneq oktobarip 25-ani unikkallarpoq. Taamaasiorput decembarimi isertitaqarsinnaanissartik qulakkeerniarlugu.

- Nuannerpoq aalisartut pisuussutit uumassusillit illersornissaat suleqatigiffigiumammassuk, Naalakkersuisoq Ane Hansen nalunaarpoq.

Taamatulli iliorneq eqqarsaatigilluagaanngitsoq Jess Svane isumaqarpoq.

- Aalisarnerup uninnerata kinguneranik suliffiit 300-ut missaat eqqorneqartussanngorput, Jess Svane oqarpoq taamalu pisasseeqqittoqarnissaa piumasaralugu.

Uummannamili aalisartut borgmesterillu piumasaat itigartinneqarpoq.

- Immikkut pisasseeqqinnissamik pilersaaruteqanngilagut, Ane Hansen KNR-imut oqarpoq.

Qaamatit pingusukkaarlugit pisassiisarneq ukiormanna atulerpoq ukioq tamakkerlugu pisassaqarnissaq qulakkeerniarlugu.

- Silaannaap allanngorneratigut sikuussaajusavissimavoq. Taamaammat ullut aalisarfiusinnaasut amerlingaatsiarnikuupput, Ane Hansen oqarpoq.

Isertitanillu annaasaqarnermik tunngavilersuuteqarneq Naalakkersuisut aalajangerneranik allanngortitsinavianngilaq.

- Naatsorsuinerit takutippaat Ilulissani, Uummannami Upernavimmilu qaleralinniarnermi ukiormanna isertitat 40 millioner koruuninik amerlisimasut, Ane Hansen oqarpoq.

Qaasuitsup Kommunia aamma Namminersorlutik Oqartussat isumaqatigiipput qassusersorneq aalisarluarnerup nalaani uninngatinneqartassasoq pisassat sukkavallaamik nungunneqartarnissaat pinngitsoorniarlugu.

Uummannami aalisartut maanna piumasarilerpaat pisasseeriaaseq allanngortittariaqartoq qanoq pisassaqartigineq aalisartumut naatsorsoruminarninngorlugu.

- Massakkut paggatsitsilluni aalisartitsisarneq piaarnerpaamik aaqqinneqartariaqarpoq, Karl Markussen Qaleralinniat Peqatigiiffianniit piumasaqarpoq.

Tamanna Naalakkersuisut peqataaffigilersarpaat.

- Pisassiisarneq allanngortinniarparput angallatit anginerit immikkut pisassaqartalersillugit umiatsiaararsortut ataatsimoortumik pisassillugit, Ane Hansen KNR-imut oqarpoq.