Immikkut ittumik timmisartuussineqassaaq
Air Greenlandip timmisartortartuisalu isumaqatigiissummik nutaamik isumaqatigiissinnaannginnerisa aaqqiagiinngissutaanerata nassataanik sapaatiummalli timmisartuussinissat tamarmik unitsinneqarput. Illuatungeriilli ullumi tallamanngornermi ullup qeqqata tungaa isumaqatigiissuteqarput, taamaattumillu timmisartuussinissat aqagu arfininngornermiit ingerlaqqilissapput.
Aqagu arfininngornermi nunatta iluani timmisartuussinissat nalinginnaasut ullorlu taanna pilersaarutaareersut ingerlanneqassapput, naak ilaasunik timmisartuussinissat taakku sapaatip akunnerani uani siusinnerusukkut taamaatinneqareeraluartut. Taakku saniatigut immikkut timmisartuussisoqassaaq, ilassut 900-t missaaniittut sap.ak. ingerlanerani Kalaallit Nunaanni ornitaminnut ingerlaqqissinnaasimanngitsut apuunniarlugit.
Air Greenlandip timmisartorsuaq Airbus 330-200 Norsaq immikkut timmisartuussitinnissaa angumerisinnaasimanngilaa, kisiannili sapaatiuppat 16. januar Københavnimiit Kangerlussuarmut uterlugulu, soorunalumi nunatta iluani timmisartuussisoqassaaq. Atlantikoq qulaallugu timmisartukkut angalasussat 700-t Danmarkimi nunatsinniluunnit ingerlaqqinnaveeqqapput, amerlanersaallu sapaammi immikkut timmisartuussinissamut inissaqarnissaat naatsorsuutigineqarpoq. Sinneruttut ataasinngorpat nalinginnaasumik timmisartuussinerni ilaassapput, taama Air Greenland nalunaarpoq.
Air Greenlandip, ilaasussat utaqqisut aqqutissarsereernissaasa tungaanut bilitsinik tuniniaaneq suli unitseqqagallassavaa. Tuniniaanerulli sap.ak. naanerani ammaateqqinneqarnissaa naatsorsuutigineqarpoq.
Ilaasut ingerlaqqissinnaasimanngitsut sap.ak. naanerani timmisartuussinissanut nuunneqassapput, aallaqqaammut angalanissamut pilersaarutit malillugit tulleriiaarineq najoqqutaralugu, tassa ataasinngormat angalasussaagaluit siulliunneqassapput, taamaallaat Danmarkimut tassanngaanniillu angalasussat akisunermiittut pinnagit, taakku sapaatiuppat ilaassapput.
Allakkat nassiussallu naassitsisoqarsinnaaleriarpat timmisartuussinerni nassarneqartassapput.
