Immikkut ittumik katersortoqassanngilaq
Inatsisartut siulittaasuat Josef Motzfeldt tusagassiuutinut taama nalunaaruteqarpoq. Inatsisartut suleriaasiat naapertorlugu siulittaasup nammineq aalajangiiffigisinnaavaa, taamaattorli politikkikkut siammasinnerusumik oqaluuserineqarnissaa piumasarimmagu, siulittaasoqarfimmi ilaasortat qaaqquneqarput isummersoqatigineqarlutillu.
Inatsisartulli 31-usut ikinnerpaamik affaat immikkut ataatsimiigiaqqusissummik akuerseqqaartariaqarnerat anguneqarsinnaanngitsoq paasinarsivoq. Siumummi inatsisartuni ilaasortaatitaasa aqqaneq marluusut ilaasa, siunnersuut akuerisinnaanngimmassuk siunnersuut itigartiinnarneqartariaqarsimavoq. Inatsisartunilu siulittaasoqarfiup itigartitsinera Siumukkormiut tusaatissatut tiguinnarpaat.
Aatsitassarsiornermut inatsisip sukateriffigineqarnissaa, ilaatigut aatsitassanik piiaanermik suliallit nunatta karsianut immikkut akiliuteqartalersinnaanissaat imaluunniit akitsuusersuiffigineqartalersinnaanissaat siunertaralugu inatsisartut immikkut ataatsimiitinneqarnissaat Siumukkormiut tallimanngormat piumasaraat.
Taamaaliortoqaraluarpalli aatsitassarsiornermik inerisaanerup unittoorsinnaanera Naalakkersuisut ernumagileraluarpaat, aningaasarsiornerummi suliffeqarniarnerullu tungaatigut unittoortoqarsinnaasorigamikku. Siunnersuutilli upernaakkut ataatsimiinnermi oqaluuserineqarsinnaanera Naalakkersuisut ammaffigaat.
Siumukkormiut oqaatigaat allannguutissat tuaviuunneqartariaqalersut, suliffeqarfissuinngooq arlallit piiaanissamik akuersissutissamik utaqqiinnarmata, upernaakkullu ataatsimiittoqannginnerani akuersissutinik periaannaasut unnerlugit.
Aatsitassanut ikummatissanullu pisortaqarfiup Siumup oqaatigisai eqqunnginnerarpai, aatsitassanillu piiaanissamut suli qinnuteqartoqarsimannginnerarlugu.
Qinnuteqartoqarpammi ukiup affaa atorlugu qinnuteqaat suliarineqaqqaartariaqarmat, Aatsitassanut ikummatissanullu pisortaqarfik taama nalunaaruteqarpoq.
