Immikkut ittumik atuartitsineq pitsaanngilluinnartutut nalilerneqarpoq

Immikkut ittumik atuartitsisarnerup pitsaassusaa ima appasitsigaaq allaat meeqqat ilikkagaqarsinnaassusaat toqqaannartumik ajorserneqarsinnaalluni. Ilinniartitaanermut Ilisimatusarnermullu Naalakkersuisoqarfiup aaqqissuussaanik isumasioqatigiinnermi tamanna saqqummiunneqarpoq.
juulip 01-at 2011 06:06

Nunatsinni 2002-mili immikkut atuartinneqalersut 2.046-pput. Tamanna 100 procentimik amerleriaataavoq.

Ajornartorsiut Naalakkersuisunit qanoq iliuuseqarfigineqarniarnersoq IA-meersup Olga P. Berthelsenip, isumasioqatigiinnermi peqataasup, maanna apeqqutigaa. Immikkut ittumik ilinniartitsisup, Johan Reimerip ajornartorsiut ilisarnarnerarpaa.

Kisitsisit Inerisaavimmeersut naapertorlugit Nunatsinni ilinniartitsisut ukioq atuarfiusumi 2009/2010-mi immikkut ittumik atuartitsisinnaasutut ilinniarsimasut taamaallaat 5,3 procentiupput.

Nunatsinnilu immikkut ittumik atuartsitsinissamut ilinniarsimasunik  ilinniartitsisukinneq peqqutaalluni atuartitsinerup pitsaannginnera, ukiuni arlaqartuni ilisimaneqareersoq Inuit Ataqatigiinneersoq Olga P. Berthelsen oqarpoq:

- Ajornartorsiutip politikkikkut eqqumaffigineqarnissaa pitsaanerusinnaagaluarpoq. Isumaqarpungalu siunissaq ungasinnerusoq eqqarsaatigalugu piffissanngortoq immikkut ittumik atuartitsinermut tunngasumik ersarinnerusumik politikkeqarnissaq, Olga P. Berthelsen oqarpoq.  

Immikkut ittumik atuartitsinerup pitsaavallannginnerata kingunerisaanik meeqqat siunissami ilinniarfissanut ingerlaqqissinnaannginnissaat Olga P. Berthelsenip ernummatigaa.

Nunatsinni meeqqat atuarfianni atuartut affaat sinnerlugit ilikkarsinnaassutsimikkut ajornartorsiuteqartut Ilinniartitsisut kattuffiannit, IMAK-imit, sapaatip akunnerani kingullermi oqaatigineqarpoq. Taamaattumik naalakkersuisuniit iliuuseqartoqarnissaa piumasaqaatigaat.

Ajornartorsiut pineqartoq immikkut ittumik ilinniartitsisutut ukiuni 25-ni sulisup  ilisaraa:

- Ilisarnarluarsinnaavoq pissutsit ataasiakkaat eqqaanngikkaluarlugit, Johan Reimer oqarpoq erseqqissaallunilu:

- Soorunalimi meeraq nalugutsigu sunarpiaq pillugu ajornartorsiuteqartoq aamma atuartinniarnissaanut ikiorneqanngikkutta qanorluunniit ilinniarsimatigigaluarutta piusaartarpugut, Johan Reimer nassuiaavoq.

Immikkut ittumik atuartitsinerup pitsanngorsarnissaanut sulinerup pingaartinneruneqarnissaa Akileraartarnermut Atugarissaarnermullu ataatsimiititaliarsuarmit inassutigineqarpoq. Nunatsinni immikkut ittumik atuartitsineq pillugu ilaatigut ima allappoq:

”Akileraartarnermut Atugarissaarnermullu ataatsimiititaliarsuup ataatsimut isigalugu paasivaa, immikkut ittumik atuartitsineq aningaasaqarnikkut, aningaasaliissuteqarnikkut atuartitsinermullu tunngasutigut akunnattoornartumut qimagaasimasutullusooq ittoq, meeqqallu immikkut ittumik pisariaqartitsisut atuarnerminni naammaginartumik ikiorserneqartarnersut ilisimaneqanngilaq”.

Nunatsinni immikkut ittumik atuartitsinerup ukioq manna januaarip aallaqqaataaniit kommuniniit isumagilerneqarnissaa pilersaarutaasimagaluarpoq. Ukiumilli ataatsimik kinguartinneqarpoq, Naalakkersuisut kommunillu akornanni isumaqatigiinniarnerit suli ingerlammata.

(Nutaarsiassaq nutarterneqarpoq 4.7. 2011 nal. 17.15)