Immikkut ittumik ataatsimiinnerup kingorna Inatsisartut ataatsimiititaliaanni nikerartoqartoq
Inatsisartut ataatsimiititaliaat qiviaraanni takuneqarsinnaavoq Atassut naalakkersuisooqatigiinnik tapersersuiunnaartoq.
Assersuutigalugu Aningaasaqarnermut Akileraartarnermullu ataatsimiititaliami Atassut ilaasortaatitaqarunnarpoq. Tassani partiip siulittaasua Aqqalu Jerimiassen Inuit Ataqatigiinneersumit Asii Chemnitz Narupimit taarserneqarpoq.
AAMMA ATUARUK Naalakkersuisuni nikerarneq: Naalakkersuisut siulittaasuata patajaatsuunissaq pingaartippaa
Tamatuma saniatigut Aalisarnermut, Piniarnermut Nunalerinermullu Atassutip ilaasortaatitaa Siverth K. Heilmann ilaasortaajunnaarpoq. Taanna Inuit Ataqatigiinneersumit Sofia Geisler-imit taarserneqarpoq.
Aqqalu Jerimiassen aamma Qinigassatut Misilitsinnissamut Ataatsimiititaliami ilaasortaajunnaarpoq. Taanna paarlallugu Kim Kielsen, Siumut, ilaasortanngorpoq.
Atassutip taperseersuisutut tunuarnerata kingorna taamatut pisoqartoq
Pissaanearfiusumi Kukkunersiuinermut ataatsimiititaliami aamma allannguisoqarpoq. Tassani Demokraatineersoq, Anna Wangenheim, ilaasortaajunnaarpoq, Siumumeersorlu Doris J. Jensen ilaasortanngormat ataatsimiititaliami Siumut manna marlunnik ilaasortaatitaqalerpoq.
Anna Wangenheim-ili Nunanut allanut Isumannaallisaanermullu ataatsimiititaliami ilaasortanngorpoq Erik Jensen paarlallugu.
AAMMA ATUARUK Atassut Naalakkersuisunut ikorfartuiunnaartoq
Partiit akornanni allanik taarsiisoqanngilaq, parteeqatigiilli akornanni paarlakaattoqarluni.
Ataatsimiititaliani sinniisoqarfinnilu ilaasortat qanoq isikkoqalerneri una toorlugu takusinnaavatit.