Assi: KNR

Tusagassiuutinik misissuineq: Immikkut ilisimasallit amigaataapput

Nunatsinni nutaarsiassani tusarfiit 6 procentiinnaat immikkut ilisimasaliupput. Ilisimatusarfiup nunatsinni tusagassiuutit pillugit nalunaarusiaani nutaami tamanna atuarneqarsinnaavoq.

Aalisartoq aalisarnermut immikkut ilisimasaqartuusinnaavoq, aningaaserinermik suliaqartoq aningaasaqarnermut immikkut ilisimasaqartuusinnaavoq ilisimatoorlu misissuiffigisamini immikkut ilisimasaqartuusinnaavoq.

Tamakkua tusagassiuutitigut tusarfiugaangamik immikkut ilisimasalittut tusagassiuutitigoortarput. Nalunaarusiarli "Tusagassiuutit 2018 - Kalaallit Nunaanni tusagassiuutinik misissuineq" naapertorlugu, immikkut ilisimasallit nunatsinni nutaarsiassani tusarfinni tamani tusarfiit 6 procentiinnaraat.

Taama ikitsiginerat nalunaarusioqataasup Naimah Hussainip arlalinnik nassuiaatissaqartippaa.

- Tusagassiortutut sulinermi suliamik tunniussinissamut piffisap killeqarneranut tunngasoraara.  Tusagassiortut suliaminnut piffissaat killeqartarmat inuit ingerlaannaq apersorusuttarpaat, ilisimatuulli allallu piffissaqarnerusarlutik, Naimah Hussain oqarpoq.

AAMMA ATUARUK KNR-ip pisortaata isornartorsiuineq paasissaannginnerarpaa

Taannali aamma isumaqarpoq, immikkut ilisimasalippassuit tusagassiuutiniinnissaminnut sungiussisimavallaannginnamik saqqummerpallaarusunneq ajortut.

- Aaqqissuisoqarfinniittut qanoq sulisarnerat malinnaaffigigaangakkit, apersuiniarlutik ilungersortorujussuusaraluarlutik inuit saqqummerusunneq ajortut takusinnaasarpara, Naimah Hussain oqarpoq.

Taannali naapertorlugu, immikkut ilisimasallit arlaannaanulluunniit attuumassuteqanngitsut ikinnerat aamma pissutaavoq.

- Inuiaqatigiiaraanitsinni inuit marloqiusanik suliaqakkajupput. Suliaqarfimmi ataatsimi immikkut ilisimasaqartut immaqa politikkimik suliaqarsimasarput imaluunniit allamik marloqiusamik soqutigisaqartutut inissisimatitsisunik suliaqarsimasarlutik taamaalillunilu attuumassuteqannginnerat apeqquserneqarsinnaalersarluni, Naimah Hussain oqarpoq.

AAMMA ATUARUK Avaleraasartoortassanik qinnuteqaatit suliarineqarneri sakkortuumik isornartorsiorneqartut

Tusarfiillu immikkut ilisimasallit nunatsinni amigaataanerisa unammillernartuuneranik oqarneq KNR-ip nutaarsiassaqartitsiviata pisortaata, Mikkel Bjarnø Lundip, isumaqatigaa.

- Tamannali misissortariaqarparput. Arlaannaanulluunniimmi attuumassuteqanngitsut naliliineri tusagassiisarnitsinnut, innuttaasullu suliamut paasinninnerulernissaannut pingaaruteqartuupput.
Taamaammat suliaq taanna naammassiniarlugu amerlanernit ikiorneqaqqulluta allatut iliuuseqarsinnaanersugut misissortariaqarparput, Mikkel Bjarnø Lund oqarpoq.

Mikkel Bjarnø Lund Naimah Hussainilu Nunatta Nipaanit apersorneqarput.

Nunatsinni tusagassiuutit, tusagassiuutinik atuineq tusagassiuutillu imarisartagaat pillugit ataatsimoortumik siullerpaamik misissorneqarput. 

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat