Immikkut ilisimasallit: Akileraaruserivik nukittunerusariaqarpoq

Akileraartarnermi inatsisit Nunatsinni ullumi atuuttut ajunngitsut, immikkut ilisimasallit marluk oqaatigaat, inatsisilli atuutsinneqarnerat nakkutiginninnerillu qanoq innersut apeqqutaaginnassasoq aamma oqaatigaat.

Suliffeqarfissuit aatsitassarsiortut arlallit, maanna nunami aatsitassanik ujaasileruttortut akileraarusunnatik piginneqataaffiusanik pilersitsereersimasut mianersoqqussutigineqarpoq. Suliffeqarfissuit taamaalioraangamik assersuutigalugu inuiaqatigiit kalaallit isertitassaagaluannik uukapaatitsisinnaapput, Naalakkersuisulli maanna nalunaarutigaat tamanna eqqummaariffigalugu.

- Ajornartorsiut Naalakkersuisut eqqumaffigaat, akileraarnikkullu isertitassatut pissarsiassagut qulakkeerusullugit, Aningaasaqarnermut naalakkersuisoq Maliina Abelsen aamma Aatsitassarsiornermut naalakkersuisoq Ove Karl Berthelsen, tusagassiuutinut nalunaarummi erseqqissaapput.

Tusagassiuutinut nalunaarut naapertorlugu inatsisit atuuttut naleqqulluartutut nalilerneqarput, Kalaallillu Nunaata inatsisinut naapertuuttunik akileraarutitigut iluanaaruteqarnissaa qulakkeerniarlugu immikkut ilisimasaqartut pisariaqartinneqartut atornissaat qulakkerusuttarlugu.

Akileraartarnermi inatsisit pillugit Aarhusip Universitetiani professorip, Jan Pedersenip, Naalakkersuisut ilumoornerarpai inatsisit Kalaallit Nunaanni atuuttut naapertuuttut, kisiannertaqartippaali.

- Akileraarutitigut isertitat Kalaallit Nunaanniiginnarnissaat pillugu inatsiseqarneq ataasiuvoq, piviusorli allaasinnaalluni, Jan Pedersen oqarpoq.

Suliffeqarfissuit akileraarusunnatik suliffeqarfiusanik pilersitsinikkut akileraarutitigut akiliinikkinnerusarnerat, taassuma sammingaatsiarsimavai:

- Suliffeqarfissuit inatsisinik unioqqutitsinngikkaluarlutik akileraartarnermut inatsisini qanoq ilinikkut akileraarutit sapinngisamik annikinnerpaaffimminiitinissaat ujartortaraat, Danmarkimi misilittakkat takutippaat. Tamanna anguniarlugu immikkut ilisimasalinnik sulisoqartarput inatsisinik misissuisussanik, Jan Pedersen oqarpoq.

Nakkutilliinerit qanoq pitsaatiginersut matumani apeqqutaava? Jan Pedersen aperaarput, akivorlu:

- Aap, apeqqutaalluinnarpoq. Suliffeqarfissuimmi pisigaangamik tuniniaagaangamillu nunarsuarmi akit najoqqutarissassagaat ataasiuvoq, qanorli iliorpiarnersut nakkutigissallugu ajornakusoorsinnaasarpoq. Pisiammi tunisallu nalilersornissaat ajornakusoorsinnaasarpoq, Jan Pedersen oqarpoq.

Suliffeqarfissuit nakkutigineqassappata Kalaallit Nunaata immikkut ilisimasallit pisariaqartikkai taassuma oqaatigaa.

Kukkunersiuisup pisortanit akuerisap, Grønlands Revisionskontorimeersup, Knud Østergårdip, Naalakkersuisut isumaqatigai, akileraartarnermi inatsisit atuuttut naapertuunnerarlugit, nakkutiginninnissamullu tunngasunut aamma isumalluarnerulluni:

- Pisortat tamatumani inissisimalluarnerupput, pissutigalugu piginneqatigiiffissuaq tassaammat uppernarsaasussaq, niuerneq ilumut pigineqatigiit imminnut sunninnginnissaannik periutsinik malinnilluni ingerlanneqarnersoq. Suliffeqarfiillu niueqatigiinnginnerminni nuussinerit suut atorneqarsimanersut, naatsorsuusiornerillu suut atorneqarsimanersut pinngitsooratik nassuiaateqarfigisussaavaat, taamaaliunngippata Akileraartarnermi aqutsisoqarfik piumasaqaateqarsinnaavoq suliffeqarfiit annerusumik akileraassasut, Knud Østergård oqarpoq.

Suliffeqarfissuilli nakkutigineqarnissaat qulakkeerneqassappat akileraartitsisartut nukittunerusariaqarnerat, taassuma nassuerutigaa:

- Ernumanngilanga, Kalaallilli Nunaanni akileraartitsisartut nukittunerusinnaapput, suliassamut matumunnga piareeqqasinnaaniassammata, Knud Østergård, kukkunersiuisoq pisortanit akuerisaq, oqarpoq.

Nakkutilliinermi sulisutigut isumalluutit pisariaqartitsineq ilutigalugu amerlineqarsinnaasut, Naalakkersuisut tusagasiuutinut nalunaarummi oqatigaat, tamannalu iliuuseqarfiginiarlugu siunertarigaat oqaatigalugu.