Immikkut ilisimasallit aatsitassarsiorneq pillugu qulaajaatinneqalerput

Nunatsinni aatsitassarsiorneq pillugu Danmarkimi ilaatigut eqqunngitsumik tunngaveqarluni oqallinnerujussuup kinguneranik, suleqatigiissitaliamik pilersitsisoqarniartoq, Naalakkersuisut siulittaasuata Kuupik V. Kleistip oqaatigaa:

- Assigiimmik paasinninnissaq kissaatigivarput. Eqqunngitsunik oqalunneq taamaatitikkusupparput. Taavalu aamma tunuliaqutaata aappaa tassaavoq Namminersorneq pillugu Nunatta Danmarkillu akornanni isumamqatigiissummi qitiulluinnartut ilagimmassuk nunavut marluk suleqatigiissasut Nunatta aningaasarsiornikkut namminiileriartornissaa sulissutigalugu, Naalakkersuisut siulittaasuat Kuupik V. Kleist oqarpoq.

Ilisimatusarfik, Danmarkimilu universitetit arlallit suleqatigiillutik nunatsinni aningaasarsiornerup siuariartortinneqarnera oqaluttuarisaanikkut qanoq issimanersoq qulaajassavaat, soorlu aamma siunissami suleqatigiinnikkut Nunatsinnut iluaqutaanerpaajusinnaasoq sunaanersoq aamma qulaajassagaat.

Ujarassiooq, Kenhavnillu Universitetiani professori Minik Rosing, suleqatigiissitaliami siulittaasuussaaq, ilaasortallu katillutik quliupput.

Suleqatigiissitaliap pingaarnertut suut suliassarinerai, taassuma nassuiaateqarfigaa:

- Kalaallit Nunaanni aatsitassat qallorniarneqartut pillugit suut ilumoortuunersut, Danmarkillu Kalaallit Nunaatalu qanoq iliornikkut iluaqutigisinnaassaneraat, immikkut ilisimasallit misissussavaat, Minik Rosing oqarpoq.

Aatsitassat suut qallorniarneqarnersut, aatsitassallu avatangiisit mianeralugit qanoq qallorneqarnerannut atatillugu inatsisitigut toqqammaviusut misissorneqassapput, Nunatsinnilu aatsitassarsiornermut atatillugu nalorninartuiaanissaq anguniagaalluni.

Kinamik suleqateqarnermi periarfissat misissorneqassapput, soorlu aamma nunat allat Kinamik suleqaternermi misilittagaqarfii suunersut misissorneqassasut, Minik Rosingip oqaatigaa.

Suliffeqarfiit Danmarkimeersut Nunatsinni aatsitassarsiornermi peqataanerusinnaanissaat aamma ujartorneqartoq, Naalakkersuisut siulittaasuata Kuupik V. Kleistip oqaatigaa:

- Isumaqartoqarnikuuvoq aningaasalersuisartut Danmarkimeersut Nunatsinnut tikilluaqqusaanngitsut, suna tunngavigigaluarnerlugu. Aammalu misigisimasoqarsimagunarluni saneqqutaarneqartutut. Taamaattumik pisariaqarsimavoq pissutsit piviusut oqaluttuarissallugit, naalakkersuinikkullu pituttorsimanngitsunik qulaajaatitsissalluni eqqortumik paasissutissiinissaq siunertaralugu, Naalakkersuisut siulittaasuat Kuupik V. Kleist oqarpoq.

Suleqatigiissitaliap misissuinera ukiup massuma naannginnerani naammassineqarnissaa siunniunneqarpoq.