Immikkut ilisimasallip nalunaarusiaq "Sorsunnerup nillertup nalaani eqqarsartaaserineqartumut" assersuuppaa
Meredip nalunaarusiaq inernilereerlugu suliakkiissutaasutut taarusunngilaa, qanganisarpaluttumilli eqqarsartaatsimik aallaveqartumik suliarineqarsimasutut nalilerlugu, High North Newsimut taama oqarpoq.
-Nalunaarusiaq arlaannaannulluunniit atanngitsumik, oqimaaqatigiissaakkamik ilisimatuussutsikkullu periutsit eqqortut atorlugit suliarineqarsimagaluarluni nikeriarfiunnginnerarpaa. Kalaallit Nunaata ilumut namminiilivikkusunnera eqqarsaatigineqarsimanngilaq. Taamatut kissaateqarneq immini kajumilersitsisuuvoq, nalunaarusiamilu tamanna eqqarsaatigineqarsimanngilaq, Mikå Mered isumaqarpoq.
Frankrigimiu amerikameersoq immikkut ilisimasalik naapertorlugu, Kalaallit Nunaat aatsitassarsiornermik ineriartortitsissaaq tamannalu aamma sapernagu. Tamannali uniffiginagu Kalaallit Nunaat aamma it-mik suliffissuaqarnikkut, takornariartitsinikkut minnerunngitsumillu suliffissuaqarnikkut ineriartortitsinissaq sioqqullugu piareersaateqarnikkut ineriartortitsisariaqarpoq. Kingullertullu taaneqartoq eqqarsaatigalugu Kalaallit Nunaat aalisarnikkut ineriartortitsilluarsimanera annertuumik periarfissaqartitsivoq.
POLARIIS Nunani avannarlerni aningaasarsiornikkut ineriartortitsineq periarfissallu pillugit nalunaarusiamik qaammatialuit qaangiuppata saqqummiussaqartussaavoq. Nalunaarusiamilu inerniliussaq tassaavoq aningaasarsiornikkut angusat ukiuni tullerni 20-ni pingasoriaatinngortinneqarsimassasut.
- Nammineernerulernissamut tunngatillugu politikkikkut inissisimaneq aatsitassallu Kalaallit Nunaata pigisaanut akigititat appasissumiinneri pissutigalugit tamakkununnga aningaasaleerusussuseqarneq annertuallaanngilaq. Taamaammat Kalaallit Nunaat niuerfissanik arlalinnik ataatsikkut ineriartortitsisariaqartoq, Mikå Mered High North Newsimut oqarpoq.
