Immikkut ilisimasalik: Juliane iluatsitsinerusimavoq
Siumumeersup Lars-Emil Johansenip IA-meersullu Juliane Henningsen Christiansborgimi inissisimaffii kikkut tigussaneraat sapaatit akunneri marluk qaangiuppata paasinarsissaaq. Taakkuali suliatik eqqaamaneqassappat?
Ph.D., Københavnip Universitetiani ilinniartitsisoq naalakkersuinermilu pissutsinik allaaserisaqartartoq, Lars Hovbakke Sørensen, Nunatsinni naalakkersuinikkut pissutsinik qanimut malinnaavoq.
Politikerit taakkua marluk tamarmik immikkut periaaseqartut, Lars Hovbakke Sørensenip tikkuarpaa. Lars-Emil Johansenip Folketingimi Atlantikup Avannaani Suleqatigiit 2009-mi qimakkamigit, socialdemokratit gruppianni ilaalerpoq, Juliane Henningsen Atlantikup Avannaani Suleqatigiinnut ataannavissimalluni.
- Taamaammat oqartoqarsinnaavoq, Lars-Emil Johansen Folketingimi socialdemokratitut immaqa sassartartoq. Juliane Henningsen KalaallitNunaata sinniisaatut sassarnerusarluni, Lars Hovbakke Sørensen oqarpoq.
Periaasissaminnillu taama qinersisimanerat, aamma tamarmik immikkut qanoq maluginiarneqartiginerannut kinguneqarpoq.Tassami Lars-Emil Johansen socialdemokratit gruuperujussannut ilanngunermigut, maluginiarneqarujussuarunnaarpoq:
- Allanit allaanerusut malunniutinngilaq, aap, socialdemokratiit anguniagaat pillugu assut sulivoq. Juliane Henningsenili eqqaassagaanni allaaneruvoq, Atlantikup Avannaani Suleqatigiinni ilaanini pissutigerpiarlugu, taamaalilunilu kalaallinut aammalu Nunatta Danmarkillu akornanni pissutsinut eqqumaniartuarami. Taamaakkamilu politikeritoqqamit Lars-Emil Johansenimik annerusumik immikkuullarissutut malugineqartarpoq, Lars Hovbakke Sørensen oqarpoq.
Aammami taassuma isaani IA-meersoq inuusuttoq Christiansborgimi ukiuni kingullerni naammassisaqarnerusimavoq.
- Ilaasortat Kalaallit Nunaanneersut Kalaallit Nunaata soqutigisaanik aalluissisussatut isigigaanni, taava oqartoqarsinnaavoq, Juliane Henningsen angusarissaarnerusoq, Lars Hovbakke Sørensen naliliivoq.
Suulli tamaasa katikkaanni folketingimut ilaasortat marluullutik pitsaasumik politikki pillugu allaaserisaqartartumit nalilerneqarput. Nersorinninniutaali tamarmik Atlantikup Avannaani Suleqatigiinni ilaagallarnerannut tunngavoq.
- Ikittunnguulluni atukkat eqqarsaatigigaanni, ilungersorsimaqaat, Folketingimilu sulisimaqalutik, soorlu ilaasortat allat taamaattut, Lars Hovbakke Sørensen oqarpoq.
IA Folketingimut qineqqusaartunut tamanut qanittukkut kaammatuivoq, qinersinerup kingorna Atlantikup Avannaani Suleqatigiinni suleqataaqqullugit.
Siumut naaggaavilluni akereerpoq.
Lars-Emil Johansen Folketingimi marloriarluni ilaasortaasarpoq. Ilaasortaanera kingulleq 2001-miit maannamut pivoq. Juliane Henningsen 2007-mi qinigaavoq.
