Immikkut ilisimasalik: IWC-mik suleqateqarunnaarneq ajoqutaasinnaavoq

- Nuna nammineerluni aalajangiisoq ulorianartorsiortinneqarsinnaavoq. Tassami nunarsuatsinni nunat tamalaat ataatsimut inissisimavugut allannguisoqassappallu tamanna ataatsimoorullugu killissarititaasullu iluini allannguisoqassaaq, nuna kisimiittutut misigisimaqqunagu, Lise Lyck oqarpoq.

Nunat tamalaat arfanniarneq pillugu ataatsimiititaliarsua. IWC isumaqatigiissuteqarfigalugu, arferit angisuut 211-it Nunatsinnit 2012-imi pisarineqarsinnaasut aalajangiunneqarpoq. Tamatumalu kingorna Nunatta Danmarki peqatigalugu, IWC-mut qinnuteqaatigigaluarpaa arfattassat qulinik ilaneqarsassasut, tamannali IWC-imi nunat ilaasortaasut amerlanerussuteqartut itigartippaat.

Itigartitsisoqarnerali soqutiginagu arferit pisarineqarsinnaasut qulinik Nunatsinnit namminersuutigineqarlutik ilaneqarput. Taamaaliortoqarneratalu kingorna, Nunatta nunarsuarmioqatigiit iluinit tapersersorneqarnini annaasinnaagaa, Lise Lyck isumaqarpoq.

- Isumaqatigiissutit malinnagit aalajangiisoqarpat, nunap nuanit allanit tapersersorneqarnini sutigut tamatigut annaasinnaavaa. Namineerlunilu aalajangiinnginnermi eqqaamaneqartariaqarpoq taamaaliornermi suna suullu annaaneqarsinnaanersut, Lise Lyck oqarpoq.

Nunatsinni arfernik piniarnerup inuuniutigineqarnera Lise Lyck-ip tupinnartoqartinngilaa piniarneq nungutaasaanngitsumik ingerlanneqarpat, tassami arferit Nunatta pisuussutigai atorluarneqarsinnaasut aamma ukiorpassuarni kalaallinit piniarneqartarsimasut.

Namminersorluni Oqartussaanerup iluani inatsimmi allassimavoq, Nunatta nammineerluni arfernik qassinik pisassiisoqarsinnaaneranik malitassamik, inatsilli tamanna Lise Lyckip apeqquserpaa.

- Inatsimmi allassimasoqaraluarpoq arfernik qassinilluunniit pisassiisoqarsinnaaneranik, eqqarsaatigilluarneqartariaqarporli nammineerluni arfernik pisassiisarneq immunut akilersinnaanersoq.

Copenhagen Business School-imi cand. polit. aamma Nunarput pillugu ilisimasaqarluartoq, Lise Lyck taama mianersoqqusivoq.