Allagaq paasissutissanik eqqunngitsunik siaruarterinerusoq taavalu taanna Danmarkip nunatta aamma USA-p akornanni avissaartitsiniutaasinnaasoq, Illersornissamik Ilinniarfimmi lektori, Jon Rahbek-Clemmensen naliliivoq:Assi: KNR

Immikkut ilisimasalik: Allagaq eqqunngitsoq pissaanilissuit imminnut ajorniarfiginerannut takussutissaasinnaavoq

Naalakkersuisumit, Ane Lone Baggerimit allagaritittuusaarneqartoq Naalagaaffeqatigiinni avissaartuutsitsiniarnermik siunertaqarsinnaavoq. Rusland Kinaluunniit nassitsisuusinnaasoq, immikkut ilisimasalik naliliivoq.

Allakkami nittartakkatigut attaveqaqatigiittarfitsigut ingerlaartinneqartumi nunanut allanut tunngasunut naalakkersuisoq, Ane Lone Bagger (S) nunatta Danmarkimit avissaarnissaanut innuttaasunik taasititsinissamut USA-mit aningaasanik amerlanerusunik piumasaqarpoq.

Allagaq Naalakkersuisut allagassiaat atorlugu Ane Lone Baggerillu atsiornera atorlugu allagaavoq – allagarli ilumuunngilaq.

Tamanna Politikenip ippassaq allaaseraa, paasissutissallu KNR-ip nunanut allanut tunngasunut naalakkersuisoqarfimmi pisortamit, Kenneth Høeghimit uppernarsartippai.

Allagaq paasissutissanik eqqunngitsunik siaruarterinerusoq taavalu taanna Danmarkip nunatta aamma USA-p akornanni avissaartitsiniutaasinnaasoq, Illersornissamik Ilinniarfimmi lektori, Jon Rahbek-Clemmensen naliliivoq:

AAMMA ATUARUK Tusagassiuutit: Naalakkersuisumit Ane Lone Baggerimit allagaritittuusaarneqartoq siammarterneqartoq

- Naalagaaffeqatigiinni Danmarkip Kalaallit Nunaatalu akoranni tatiginninnginneqangaatsiarnera pissutigalugu immikkoortut ilaanni sanngiittoqarpoq. Tatiginninnginnerlu taanna atorlugu Danmarkip Kalaallit Nuaatalu akornanni avissaartuunnermik annerusumik assigiinngitsut pilersitsiniarsinnaapput – assersuutigalugu allagaq una atorlugu, Jon Rahbek-Clemmensen oqarpoq.

Dansk Folkepartimeersup, Søren Espersenip aningaasaqarnermut naalakkersuisoq, Vittus Qujaukitsoq Alaskami tikeraarnermini USA-mut illugiilluni isumaqatigiissuteqarniarsimanersoq apeqquseraa Jon Rahbek-Clemmensenip Naalagaaffeqatigiit iluanni tatiginninnginnermut assersuutigaa.

Kina allakkamik nassitsisuua?

Allakkap kimit allagaasimanera ilisimaneqanngilaq. Allagarli Ruslandimit Kinamiilluunniit allagaasinnaasoq, Jon Rahbek-Clemmensen naliliivoq.

Poltikenip allaaserisaa naapertorlugu allagaq nittartakkatigut attaveqaqatigiittarfinni, Redditimi Indybayimilu siammarterneqarpoq. Assi Indybayimeersuuvoq.

 

- Tamanna ilusilersorneqartumi annerusumi maannakkorpiaq takusinnaavarput. Kina, Rusland USA-lu imminut ajugaaniutileqqapput, akuleriittumillu iliuuseqartarput – tassa sorsunnermik ingerlatsinngikkaluarlutit assigiinngitsutigut akornusersuinernik imminnulluunniit ajorniarfigiinnertut isigineqarsinnaallutik, Jon Rahbek-Clemmensen oqarpoq.

Rusland Kinaluunniit nassitsisuunngikkuni alla nassitsisuusinnaavoq – imaluunniit kimilluunniit takorloorneqanngitsoq nassitsisuusinnaalluni, immikkut ilisimasalik oqarpoq.

Tamanut ajoqutaasoq

Allakkap ilumuunngitsup nittartakkatigut attaveqaqatigiittarfinni siaruarterneqarnera amerikamiut Kalaallit Nunaannik ukkataqarnerata nalaani pivoq.

Aqagu, pingasunngornermi Ane Lone Baggerip danskit nunanut allanut ministeriat, Jeppe Kofod (Soc) peqatigalugu ataatsimiittussaavoq. Tassanilu amerikamiut nunanut allanut tunngasunut ministeriat, Mike Pompeo ataatsimeeqatigissallugu, danskillu nunanut allanut tunngasunut ministeriata siullerpaamik naapittussaavaa. Aamma danskit nunanut allanut ministerinngorlaap Amerikami nunanut allanut ministerimik ataatsimeeqateqaqaarnerani kalaallimik naalakkersuinermik suliaqartumik siullermeerluni peqataasoqassaaq.

Jeppe Kofodip Ane Lone Bagger ataatsimeeqatigiartorlugu oktobarimi aamma Nuummiippoq. Piffissamilu tassanerpiat amerikamiut atorfilittaat, Thomas Ulrich Brechbuhlimik ateqartoq aamma illoqarfiit pingaarnersaanniippoq. Taassuma amerikamiut aallartitaqarfianit, Carla Sands sinniisullu amerikamiut illersornissamut ministereqarfianeersut USA-llu sillimaniarnermut siunnersuisooqatigiivineersut ilagai.

AAMMA ATUARUK Ane Lone Baggerip Pompeo naapileraa

Aammattaaq amerikamiut sinerissami alapernaarsuisuini naalakkat qaffasinnerpaartaat Karl Schultz qaammat kingulleq nunatsinnut tikeraarpoq.

Amerikamiut Danmarkimi aallartitaata, Carla Sandsip nunarput ukioq manna qasseeriarluni tikeraarpaa, tamatuma saniatigut amerikamiut sinniisui nunatsinniittut ataatsimiit arfineq-marlunnut 2020-mi amerliniarai oqaatigineqarpoq.

Naak nunanut allanut tunngasunut naalakkersuisoqarfiup allagaq eqqunngitsuusoq erseqqissaatigereeraluaraa, tamanna tamaannga killeqanngilaq. Allagarmi tutsuiginnginnginnermik avissaartuutsitsinermillu sunniuteqarnissaata kissaatigineqarneratut sunniuteqassagunarpoq.

AAMMA ATUARUK Nunarput pissaanilissuarnit ukkatarineqartoq: Iluaqutigisinnaavarput

Tassami oqaluttuamik ilumuunngitsumik atuartunut, tamatuma ilumuunngissusianik oqaluttuap apuunnissaa qularnarsivinngitsoq, Rahbek-Clemmensen naliliivoq: 

- Taamaammallu naalagaaffeqatigiinnermut taavalu aamma Kalaallit Nunaata, Danmarkip USA-llu attaveqatigiinerannut pitsaavallaanngitsumik kinguneqartumik nittartakkatigut sunniuteqarsinnaavoq, Jon Rahbek-Clemmensen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat