Immikkut atuartittariaqartut ilikkagassaat killeqalersinnaapput
-Meeqqanut immikkut annertusisamik atuartinneqartariaqartunut, ilaatigut DAMP-imik ADHD-millu nappaateqartunut atuartitsinissamut aningaasaliissutit ukiumi nutaami atuarfiulertussami appartinneqarnissaat, Qeqertarsuup Atuarfiani meeqqanut immikkut atuartinneqartariaqartunut ilaqutaannullu annertuumik sunniuteqarnerlussaaq meeqqallu pineqartut ilikkagaqarsinnaanerannut millisaataassaaq – tamannalu akuersaarneqarsinnaanngilluinnarpoq. Taama oqarpoq Qeqertarsuup Atuarfiani atuarfiup pisortaata tullia, Anders Stephensen.
Qeqertarsuup Atuarfiani meeqqat immikkut atuartineqartariaqartut aqqaneq-marluupput taakkunanngalu meeqqat arfineq-marluk missaanniittut augustip aallaqqaataaniik naliginnaasumik atuartitaasalissapput. Ilinniartitsisullu immikkut atuartitsisuusartut arfineq-marluk missaanniikkaluartut ukiumi atuarfiusussami nutaami taamaallaat sisamat missaat taamatut atorneqalissapput.
Anders Stephensen isumaqarpoq aningaasaliissutit appartinneqarnissaat meeqqat pineqartut ilinniakkatigut katataanerannik kinguneqarumaartoq, nangipporlu:
-Atuartut ataasiakkaat ilaqutaallu kisimik eqqorneqaratik aammali atuarfitsialammi ukiuni makkunani anguniakkatsinnut tamanna naapertuutinngilluinnarpoq – unalu nalilerneqartariaqarpoq Namminersornerullutik Oqartussanit meeraq pingaarnerutinneqarani aningaasarli pingaarnerutinneqartoq, Anders Stephensen naggasiivoq.
Namminersornerullunik Oqartussat ataanni Avannaani tarnit pissusaannik siunnersuisooqatigiiffimmi, PPR-avannaani Ilulissaniittumi aqutsisuusoq Ane Margrethe Jessen oqarpoq, ilinniartitsisut qisuariaataat paasilluarsinnaagini innersuussutigalugulu Namminersornerulluni Oqartussanit atuartitsinermi tiimit ikilisinneqarsimanerat.
