Immikkut akuersissut pissaanermik atornerluinerunngilaq

Immikkut ilisimasallit inassutaat assortorlugit, Ilulissani illiniliuutit imeqarfikkoortarnissannik, Naalakkersuisut immikkut akuersissuteqarnerat naliginnaasuunngilaq, kisianni pissaanermik atornerluinerunngitsoq, ingerlatsinermut tunngasunik immikkut ilisimasalik naliliivoq.
Allattoq Jens Thorin
juunip 10-at 2010 10:44

- Immikkut ilisimasallit nammineq atorfeqartit oqaaatigisimasaannit allaannerusumik aalajangerneq naliginnaasuunngilaq. Inatsisinik Ingerlatsinermut tungasunik immikkut ilisimasalik aamma Copenhagen Business Schoolimi professori Claus Haagen Jensen gtaama oqarpoq.

Nunatsinni Nakorsaaneqarfimmiit Namminersorlutillu Oqartussat inatsiseqarneq pillugu allaffianniit mianersoqqutit assortorlugit, Illiniliuutit Ilulissani imeqarfikkoorsinnaanngorlugit, Naalakkersuisut immikkut akuersissuteqarput.

Illiniliuutip motoria assersuutigalugu uuliakoorpat, imeqarfik ajortissinnaasoq, Nunatsinni Nakorsaaneqarfiup tikkuarnikuuaa.

Aalajangerneq illua tungiliuttut partiivisa Siumup Atassutillu "pissaanermik atornerluinertut" taanikuuaat, immikkut akuersissuteqarnissaq pingasoriarluni itigartitsissutigineqareersimammat.

Claus Haagen Jensenip erseqissarpaa, nammineq pinngortitalerinermik ilinniarsimasuunnginnami, taamaammallu matuma avatangiisinut kingunissaa nalilersinnaanagu. Kisianni aalajangigassani taamaattumi Naalakkersuisut aalajangeeqatigissiinnaapput.

Tassalu immikkut ilisimasallip aalajangerneq pissaanermik atornerluinertut taarusunngilaa.

- Oqarusuppunga, Immikkut ilisimasallit oqaaatigisimasaannit allaannerusumik aalajangerneq naliginnaasuunngitsoq. Kisianni taava naalakkersuisoq ima aperisassaqqippoq: Sooruna immikkut ilisimasallit, illit sulisuvit, oqariartuutaannit allaanerusumik inerniliisinnaasutut isumaqarpit?

Nunatsinni Nakorsaaneqarfiup inatsiseqarnermullu allaffiup mianersoqqussutai, professorip nangaasaarinertut atuarpaa, akerliunetuunngitsoq.

- Taava allat - tungagassiortut Inatsisartunilu illuatungiliuttut - naalakkersuisumut saattariaqassapput aperalutillu, Taamatut aalajangernissamut suna tunngavigiviuk? Tassami arlaannik nassuiaatissaqassangaluarpoq, professor Claus Haagen Jensen oqarpoq.

Avatangiisinut naalakkersuisoq Anthon Frederiksen, nassuiaanikuuvoq, borgmesteriugallarnerminit Ilulissani pissutsinik ilisimasaqarnini tunngavigalugu immikkut akuersissuteqarsimalluni.