Immikkut akuersissut Ilulissani nuannaarutigineqarpoq

Ilulissani qimussit aqqutaasa iluarsaanneqarnissaat peqatigiiffiit taakku ukiorpaalunngortuni anguniarsimavaat.

- Ilulissani qimussit aqqullunnerat peqqutaalluni takornariat ataasiaratik aqqunartitertarput, Qimussersaq 1971-imeersoq Godmann Filemonsen oqarpoq.

Ilulissani Qimussertartut Peqatigiiffiat aamma Ilulissani Aalisartut Piniartullu Peqatigiiffiat arlaleriarlutik naalakkersuisut siuliinutsaaffiginnittarsimagaluarput, qamussuit illiniliuutit aqqutigissaanermi atorneqartussatut akuereqqullugit.

- Qamussuit taamaattut Aasianni Sisimiunilu atorneqarput, tamarmik imeqarfiit saneqquallugit ingerlasarlutik, taakkulu immikkut akuerineqarsimallutik, Godmann Filemonsen oqarpoq.

Illuatungiliuttut Siumup siulittaasua Aleqa Hammond siuttoralugu naalakkersuisut namminissarsiortuunerarlugit ippassaq saassutaraat.

Ilulissani imeqarfiup tungaanut qamussuarnik illiniliuutinik ingerlaartoqarsinnaanissaa pillugu naalakkersuisut immikkut ittumik akuersissuteqarnerat, Peqqinnissaqarfimmit aamma Nukissiorfimmit mianersoqqussutigineqareerpoq.

Immikkut akuersissuteqarnerup kinguneranik qamussuit illiniliutit imeqarfiup tungaanut ingerlasinnaalernerat, Qaasuitsup Kommuniani Avatangiisinut Sanaartornermullu Ataatsimiititaliami siulittaasup Beernaat Olsenip nuannaarutigaa.

- Imeqarfiup tungaanut ukiuni qulini ingerlaqqusaasimanngilagut. Tamanna Sisimiuni Aasiannilu periarfissaareerluni, Beernaat Olsen oqarpoq.