Immikkut akissarsititsineq peqqinnissaqarfimmut akisoorujussuussaaq

Isumaqatigiisitsiniartartumut suliassanngortitsinermi, Peqqinnissaq Pillugu Kattuffik ajorsassappat, tamanna Namminersorlutik Oqartussanut kinguneqarnerlussinnaavoq.

Kikkut tamarmik atorfininnerminni immikkut akilerneqartarumappata, Namminersorlutik Oqartussanut akisoorujussuanngorsinnavoq. Peqqinnissaq Pillugu Kattuffiup siulittaasua Karin Holler taama oqarpoq:

- Aqqut taanna maanna atortariaqaleratsigu ajuusaarnaraluaqaaq, Karin Holler, Peqqissaasut Kattuffianni siulittaasoq oqarpoq.

Maajimi isumaqatigiissummi peqqissaasut akissarsiaasa ukiut pingasut tulliit ingerlanerini 19 procentinik qaffanneqarnissaat isumaqatigiissutigineqarpoq.

Taartaasartut pillugit nutaamik aaqqiisoqarnissaa aamma isumaqatigiissutigineqarpoq. Aggustimilu sulisussarsiortoqarmat peqqissaasut Hollandimeersut Peqqissutsimut Naalakkersuisoqarfimmit atorfinitsinneqarput.

Peqqissaasut atorfinitsinneqannginneranni oqaatsinik pikkorissarneqarnissaat aamma isumaqatigiissutigineqarpoq.

Peqqissaasut nunani allaneersut oqaatsinik pikkorissartinneqarnerminni piffissartornerminnut taarsiiffigineqarnissaat aamma neriorsuutigineqarpoq.

Peqqissaasulli bonusisiaqarsinnaanissaat akissarsiat pillugit isumaqatigiissummut unioqqutitsinerusoq, Peqqissaasut Kattuffiata PPK-p Namminersorlutillu Oqartussat novembarip naajartulernerani isumaqatigiissutigaat.

Piffissartornermut taarsiiffigitinnermut tamanna aamma atuuttussanngortinneqarpoq.

Peqqissaasulli nunani allaneersut oqaatsinik pikkorissartinneqarnerminni piffissartornerminnut taarsiiffigineqarnissaat, Peqqissutsimut naalakkersuisoqarfiup attappaa:

- Tamanna ilaatigut soqutigisaraarput, inuit taamannak piffissamik atuinissamut kajumilernissaat, Peqqissutsimut naalakkersuisoqarfimmi pisortaq Ann Birkekær Kjeldsen taamanikkut oqarpoq.

Isumaqatigiisitsiniartumut suliassanngortitsinermi PPK-p ajorsarnissaa, PPK-p siulittaasuata Karin Hollerip ernumassutiginngilaa.