Issittup soqutigineqaleraluttuinnarnerata naalani Center for Arktiske Sikkerhedsstudier pilersinneqarpoq. Nunarsuup kiatsikkiartornera aatsitassanik niueruteqarnermi aatsitassarsiornermilu nutaanik periarfissaqalersitsivoq, tamannalu nunarpaaluit Issittumik minnerunngitsumillu nunatsinnik soqutiginnerulernerannik kinguneqarpoq.Assi: KNR / Anton Gundersen Lihn

Immikkoortortaqarfittaaq Issittumi isumannaallisaaneq pillugu ilisimatusarfiussasoq

Nuummi sulisoq ataaseq Københavnimilu sulisut sisamat Issittumi isumannaallisaaneq pillugu Immikkoortortaqarfimmi sulissapput, taakkualu Issittumi isumannaallisaanermik allannguineq pillugu paasissutissiisassapput.

Illersornissamut ilisimatusarfik, Forsvarsakademiet, Issittumi isumannaallisaaneq pillugu immikkoortortaqarfimmik pilersitsippat, Issittumi illersornissaq isumannaallisaanerlu immikkut sammineqassapput. Center for Arktiske Sikkerhedsstudier (CAS), ukioq manna marsimi pilersinneqassaaq.

CAS Issittoq pillugu paasissutissanik oqartussanut avitseqatigiittassaaq, siunnersuisutullu aamma atorneqartassalluni.

Center for Arktiske Sikkerhwedsstudierip Ilisimatusarfik suleqatigissavaa, tassanilu sulisussat tallimat akornanni ataaseq Ilisimatusarfimmi inissisimassalluni.

Immikkoortortaqarfik suleqatigiinnermut isumaqatigiissummik tunngaveqartoq

Paasissutissanik avitseqatigiittoqartarnissaa Illersornissamut ilisimatusarfiup Ilisimatusarfiullu akornanni siorna isumaqatigiissutigineqarpoq, soorlu aamma suliniutit assigiinngitsut suleqatigiissutigineqassasut.

AAMMA ATUARUK Ilisimasaqarnerup nunarput Danmarkilu Issittumi siuttuutissagai

Silap pissusiata allanngoriartgornerata Issittumut sunniuteqaatai pillugu ilisimatusartoqassaaq, naalagaaffeqatigiit Issittoq pillugu aalajangiiniarnerminni paasissutissanik avitseqatigiittoqartassalluni.

- Issittumi isumannaallisaaniarneq allanngoriartupiloorpoq, annertunerusumillu ilisimatusarfigineqarnissaa pingaaruteqarpoq, illersornissamut ministeri Trine Bramsen oqarpoq.

Nunat pissaanilissuit soqutiginninnerat pissutsinik allannguisoq

Issittup soqutigineqaleraluttuinnarnerata naalani Center for Arktiske Sikkerhedsstudier pilersinneqarpoq. Nunarsuup kiatsikkiartornera aatsitassanik niueruteqarnermi aatsitassarsiornermilu nutaanik periarfissaqalersitsivoq, tamannalu nunarpaaluit Issittumik minnerunngitsumillu nunatsinnik soqutiginnerulernerannik kinguneqarpoq.

Nunat pissaanilissuit tassa USA, Kina Ruslandilu Issittumik soqutiginninnerulerput, tamannalu naalakkersuinikkut pissutsinik allannguivoq.

Rusland Issittumi sakkutooqarfimminik ukiuni kingullerni annertusaavoq, Kina nunatsinnut aningaasaaliinissaminut soqutiginnippoq USA-lu naalagaaffeqatigiinnermi iligisatut qaninnerpaatut imminut malunnartinniarluni Nuummi aallartitaqarfimmik ammaalerluni.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat