Assi: Larsen Jens Kragh

Immikkoortortaqarfimmi Tasiilami pisortap suliniut ilassilluaraat

Isumaginninnermi sulinermi piujuartussamik pitsanngorsaasoqassappat sumiiffimmi sulisut ilaatinneqarnissaat tunngaviusumik pingaaruteqarpoq. Tasiilamut immikkoortortaqarfimmii pisortaq aamma Peqatigiiffik Kalaallit Meerartaat taama nalunaarput.

Isumaginnittoqarfimmi sulineq eqqarsaatigalugu ikiuutaasinnaasut tamaasa atorfissaqartippavut. Iluarsiissutit piujuartussat iluaqutaassappata sumiiffimmi sulisut pingaartilluinnartariaqarput. 

Immikkoortoqarfimmi Tasiilami pisortaq, taamalu sumiiffimmi Kommuneqarfik Sermersuup immikkoortortaani sulisunut 500 missaaniittunut pisortaasoq Hjørdis Viberg oqarpoq. 

- Sulisut ilinniarsimasut misigittartullu pisariaqartippavut. Maanimiuusugut ilaatinneqarnissarput ikiorsiinerullu ataqatigiissaarneqarluartumik ingerlanneqarnissaa pingaaruteqarnerpaavoq, isumaginninnermut tunngasut tungaasigut Inatsisartut Danmarkimik ikiortiserinninnerat pillugu oqarpoq.  

Siullermik sulilluapallattut taava ungasinnerusoq isigalugu ineriartorneq

Qanittoq isigalugu pingaartumik sulilluapallattussat pisariaqarput. Tassa sulisut ilinniarsimasut ingerlaannartumik isumaginninnerup tungaatigut suliassarpassuarnik tulleriiaartunik massakkorpiaq suliarineqarnissaminnut utaqqisunik aallartitsisussat. 

- Tassarpiaapput inunnik isumaginnittut tarnillu pissusaanik ilisimasallit. Maanngarsinnaasut maanilu suliassarpassuarnik ikilisaallutik aallartissinnaasut, tamannalu aallaavigalugu suleqatit ulluinnarni maani tamakkuninnga suliaqartunut suleriaasiliuunnissaannik aallartitsisut, taama oqaaseqarpoq. 

Siunissaq ungasissoq eqqarsaatigalugu sumiiffiup eqqarsaatiginissaa pingaaruteqarluinnarpoq. Sumiiffimmiut pikkorissarnissaat nukissaqarfigisariaqarpoq, imaluunniit Hjørdisip oqarneratut ”nammineq sulisutta siunissami suliassanik ingerlatsisinnaalernissaannut inerisassallugit.”

Isumaginninnerup tungaatigut Tasiilami nunalluunniit sinnerani ajornartorsiutit imaaliallaannaq qaangerneqarsinnaanngitsut erseqqissarpaa. 

- Pimoorullugu ingerlatsineq aqqutissaraarput. Iluarsaassineq suliassallu ikilisarnerat ajunngilaq, iluaqutaanavianngilarli kingornatigut amerliartuinnaqqilissappata, oqarpoq.  

AAMMA ATUARUK Martha Abelsenip Tasiilaliarnissani aalajangiusimagaa

Tallimanngorpat borgmesterit naapissapput 

Peqatigiiffik Kalaallit Meerartaat-ni generalsekretæri Puk Draiby aamma taamatut naliliivoq. Suliniarneq sivisuumik iluaqutaassappat sumiiffimmi inuiaqatigiit ilanngutitinneqarnissaat piginnaasaasalu nukittorsarneqarnissaat tunngaviusumik pingaaruteqarput. 

- Taamaanngippat piujuartussamik iluaqutaanavianngilaq. Kalaallit Nunaannimi tmanna misilittarneqarnikooqaaq. Imaanngilaq isumaginninnermut suliniutaanngitsut, kisianni sulianiarneq akuttunngitsumikiluaqatuaaneq ajorpoq sumiiffimmi pissutsinut naleqqussagaaneq ajormat, oqarpoq. 

KNR aamma Kommuneqarfik Sermersooq-mi borgmesteri, Asii Chemnitz Narup (IA), oqaaseqartinniarsimagaluarpaa, kisianni apeqqarissaarfigineqarusussimanngilaq. 

Nunatsinni borgmesterit sinneri isumaginninnikkut suliniutit pillugit ataatsimeeqatigeqqaarlugit tallimanngornermi oqaaseqarniarluni oqaatigaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat