Arnaqatiminnoortartut anguteqatiminnoortartullu Savalimmiuni immikkoortinneqartarneri danskit ministeriunerata Anders Fogh Rasmussenip aliasuutigaa.
- Inuit immikkoortinneqartannginnissaat inuiaqatigiit sumiikkaluarunilluunniit qulakkeertariaqarpaat – arnaqatiminnoortartut anguteqatiminnoortartullu Savalimmiuni aamma uani eqqarsaatigaakka. Savalimmiuni naalakkersuinermik suliaqartut Danmarkimit akuliuffigerusunngikkaluarlugit oqarusuppunga taamatut immikkoortitsineq assut mamiatsaatigigakku, danskit ministeriunerat tusagassiortunik katersortitsinermini ullumi oqarpoq.
Savalimmiuni arnaqatiminnoortartunik anguteqatiminnoortartunillu immikkoortitsisarneq inerteqqutaassanersoq sapaatip-akunnerani uani taasissutigineqassaaq. Arnaqatiminnoortartut anguteqatiminnoortartullu immikkoortinneqarneri inatsisitigut ullumikkut akuerisaavoq. Tamatuma atorunnaarsinneqarnissaanik inatsisissatut siunnersuut siorna itigartitsissutigineqarpoq.
- Savalimmiuni Namminersornerullutik Oqartussat inatsisiortussaatitaavoq. Taama inatsisiliornermut Danmark akuliussinnaanngilaq akuliukkusuganilu. Tamanna pisortatigoortumik anguniagaavoq. Uangali naalakkersuinermik suliaqartutut oqarusuppunga; Savalimmiuni pissutsit taamaattut tusaraangakkit takugaangakkilluunniit aliasuummertarpunga. Inuit immikkoortinneqannginnissaat inuiaqatigiit sumiikkaluaraangamillunniit qulakkeertariaqarpaat. Nunani allani pisut pillugit Danmarkimi naalakkersuinermik sulialittut oqaaseqarnera erseqqissarpara, ministeriuneq oqarpoq.