Immiat litererpaaluit arsaarinnissutigaat

Nuummi politiit sapaatip akunnera qaangiuttoq assigiinngitsunik suliaqarsimapput.
Allattoq Noah Mølgaard
decembarip 27-at 2011 13:12

Nuup ilaani Nuussuarmi unioqqutitsilluni immiortoq juullikkuni tigusarineqarpoq. Immiaq dunkinut 2 literikkaanut immiuteriigaq 16 literi arsaarinnissutigineqarpoq. Taassuma saniatigut immiaq 25 literi suli dunkinut immiunneqanngitsoq aamma arsaarinnissutigineqarsimavoq.

Immiaq politiit arsaarinnissutigereerpaat taassumalu tuniniarnissaa immiortuata siunertarisimagaluarpaa.

Ikiaroornartumik hashimik ujarlernermut atatillugu angerlarsimaffiit marluk politiit misissuiffigisimavaat tassanilu inuk ataaseq tigusarineqarsimasoq, Nuummi politiit nalunaarput.

Illoqarfinni allani tillinniat juullikkuni "sulinngiffeqartut" Nuummi tillinniat ulapaarsimapput. Biilit sisamat tillinneqarsimapput aammalu taxap aningaasivia 5.285 koruuninik imalik tillinneqarsimalluni. Tillinniattaaq inissiat arlaat tillinniarfigisimavaat fjernsyn 42 tomme aamma qarasaasiaq angallattagaq LC tillissimallugit.

Politiit aamma nalunaarutigaat pisiniarfinni tillinniat marluk sapaatip akunnerani qaangiuttumi nalunaarutigineqarsimasut.