Immiaq immiaaqqamit piumaneruaat

Arnaq kinaassuserminik saqqummiusserusunngitsoq oqaluttuarpoq ukiuni qulini kingullerni immiartortarluni:

- Siornatigut imertakkavut pitsaasartorujussuusarput, sanalluakkat, massakkunukua asuli sanaleqqasut, aningaasarsiutigileqqallugulu pigamikku, taamaammat naammassineqanngitsunik ilaanni imertarpugut.

Naak napparsimanissaq qanikkaluartoq taassuma immiartortarneranut imigassamik aalakoornartumik amigaateqartarnera peqqutuigaa.

- Putumarusuinnarluta imerparparput.

Taassumalu oqarnera naapertorlugu immiamik pissarsinissaq ajornanngeqaaq, ingammik najugaqarfigisaani, Nuup ilaani Nussuarmi. Oqaluttuarpoq, immiaq iluamik immiugaasimagaagami aalakoornartaqisoq. Sannarlutaagaangalli:

- Sannarlunneqarsimagaangat meriarluta naarlullutalu pisarpugut.

Tamannalu Nunatsinni nakorsaanerup Flemming Kleist Stenzip uppernarsarpaa:

- Immiat tamakkua arlalitsigut ajoquteqarsinnaapput. Siullermik qappiornera naammatsissimanngeratarsinnaavoq aalakoornartunnguukkiartuaarneraniluunniit minguiarnera naammassisimanngeqaratarsimasinnaalluni, taamaalillutik imerukkut mingummik iioraasinnaavatit, tamannalu pisiniarfimmi imigassarsiamut naleqqiullugu napparsimanarnerusinnaavoq, Nunatsinni nakorsaaneq Flemming Kleist Stenz oqaarpoq.

Nuussuarmili immiortartoqaqineranik, tusarfitta oqaluttuaa Nuummi politiit ilisarisinnaanngilaat. Nuummi politiineersoq Carl Sværd oqaluttarpoq, ajornartorsiummik tamatuminnga saffiginnissuteqartoqarneq ajungajattoq, ukioq manna saaffiginnittut sisamaannaallutik, taakkunanga marluk suliassanngortitsinermik kinguneqarlutik.

Nunattalu sinnerani suliassanngortinneqartut ikinnerupput, Nummi suliassanngortitat saniatigut suliaq ataasiinnaammat. Tassalu politiit immiortartunut nunatsinni tamarmik pingasunut ukioq manna ornigussimagamik,  suliassani salliutinngilaat.

Oqaatiginninnerup tutsuiginassusia, uppernasaatissatut nassaat tunngavissaanerat sulisullu piffissaqassusiat apeqqutaatillugit,  oqaatiginnissut politiit misissoriartortaraat, Carl Sværd oqarpoq.

Radioaviisimut oqaluttuartup kinaassuserminik saqqummiusserusunngitsup allat immiartortarnissaannik nangaasaarpai:  

- Inuusuttuaqqat tamakkuninnga imeqqunanngeqaat aammami inersimasut, ilikkaqqunanngeqaat, ilikkarlugu tarnilunnartorujussuusarpoq.