Immiaaraq oqaluttuarisaanermut pingaarutilik akitsorterussinermi tunineqartoq
Immiaaraq ukiunik 140-nik pisoqaassusilik, issittumi ilisimasassarsiornermi nassatassatut immiarineqarsimasoq, 3300 pundilerlugu tunineqarsimavoq - imaappoq 34.000 koruunilerlugu - tassalu nalilerneqaqqaarneraniit tallimariaammik akitsorsimavoq.
Allattoq Ritzau
juunip 17-at 2015 04:29
Nutserisoq Erna Lynge
Puiaasaq Allsop's Arctic Ale, Burton-upon-Trentimi immiorneqarsimavoq, ilisimasassarsiornermut sir George Naresip 1875-imi aqutaanut immiarineqarsimasoq, BBC-p allaaseraa.
Immiaaraq garagemi Shropshiremiittumi illoqarfimmi Gobowenimi nassaarineqarsimavoq.
Immiiaqqatoqqap akitsorterussinermi 600 pundilerneqarumaarnissaa ilimagineqarsimagaluarpoq.
Skotlandimiu katersisartoq oqarasuaatikkut pisisuusimavoq.
Akitsorterussinermi puiaasamik piserusuttut najuuttuusimapput, ilaat nittartakkatigut oqarasuaatitigullu akitsorterusseqataasut.
Akitsorterussisarfimmi Trevanion and Deanimeersoq Aron Dean oqarpoq, tusakkani naapertorlugit immiaaraq imerneqarsinnaasoq, tungusunnilaarluni tupasunnialaamik akulimmik. Puiaasalli ammarneqannginnini soqutiginaatigaa.
