Immiaaraq nunatsinneersoq mamarnepaatut toqqarneqartoq

Juulli qanilliartorpoq naalagaaffeqartigiinnermilu immiorfiit ukiumoortumik immiaaqqamik mamarnerpaamik Horsens Forumimi unammisitsineranni ukioq manna immiaaqqat mamarnersaat aamma toqqarneqarpoq!

Juullip immiaraa taartoq nunatsineersoq ukioq manna mamarnerpaatut Horsens Forumimi toqqarneqarpoq. Immiaaraq Narsami immiorfiup, Greenland Brewhousep, immiaaraliaa Greenland Christmas Ale, immiaaqqat unammissutaasut 48-t akornanni mamarnerpaatut toqqarneqarpoq – Tuborgip, Hancockip immiorfiillu allat juullimut immiaaraliaat Greenland Christmas Alep ajugaaffigai. 5000-t missaanniittut taaseqataapput.

Belgiamiut immiorfiata Rolls Roycep juullimut immiaaraliaa Gouden Carolus Christmas unamminermi toqqarneqarnerpaanut ilaavoq.

Salik Hard radioavisimut oqaluttuarpoq Narsami immiorfeeraq ingerlalluartupilussuusoq.

- Danmarkimi immiaaqqanit immikkut ittunit uagut immiaaraliarput tunineqarnerpaasoq qanittukkut paaseqaammerparput – qaammatit pingasut ingerlaneranni immiaaqqat Narsameersut 200.000-t tunineqarput. Ingerlalluaannassagutta kalaallit immiaaranngersut 2007-p qiteqqunnerani immiaaraliatsinnik pisisinnaalissapput. Nunatsinni immiaaqqanik maqitsisarnissaq siammarterinissarlu anguniarlugit maanna Nuuk Imerlu isumaqatigiinniarpugut, Salik Hard oqarpoq.

Immiaaqqat nunatsinneersut Narsami kisimik maqinneqarneq ajorput – Nuummi immiorfiup Godthåb Bryghusip juullimut immiaaqqiani unnugu sassaalliutigissavaa.

Ukioq manna aamma juullissaqqaarpoq…….