Immiaaraq Kujataaneersoq nunarput tamakkerlugu nioqqutaalissaaq
Nuuk Imeq aamma Greenland Brewhouse Narsamiittoq isumaqatigiipput, immiaaraq Kujataaneersoq puisaasanut Nuuk Imermeersunut maqinneqartalissasoq, taamaalilluni immiaaraq Greenland Brewhouse-meersoq Kalaallit Nunaanni tamarmi ungasinngitsumiit pisiarineqarsinnaalissaaq.
Sermitsiaq nittartakkamini taama allaaserisaqarpoq.
Immiaaqqat siulliit Nuummut qaammatip tulliani nassiunneqassapput, Greenland Brewhousemilu pisortap, Salik Hardip, ilimagaa, immiaaqqat taakku maajip qaammataata naalernerani juunilluunnit aallartilaarnerani pisiarineqarsinnaalissasut.
Immiaaraq ataaseq pisiniarfinni 25 koruuneqassaaq.
Greenland Brewhouse-p immiaaraq sermimit sermersuarmeersumit aatsitamit immiortarpaa.
”Juullip Inuata immiaaraa” Greenland Brewhouse-meersoq immiaaqqat Danmarkimi pitsaanersat aappaattut siorna qinerneqarpoq, qinigassat assigiinngitsut 50-iusimallutik.
Ajugaavoq Belgiameersoq Gouden Carolus Christmas.
