Immiaaqqat saarnginut nukittortitsisarput

Immiaarartorit saanitillu nukittortikkit. Tuluit nunaanni misissuinerit nutaat takutippaat, saarngit napiasisarnerannik nappaateqalersimagaanni immiaaqqat iluaqutaasartut.

-Paasisaq soqutiginartorujussuuvoq. Tamatta nalunngilarput saarngit napiasisarnerannik nappaateqalersimagaanni calsiummip sakkukillisittaraa. Paasivarpulli immiaaqqat imigassartaata sunniutaa pitsaanerunngikkuni assigigaa, professori Jonathan Powell King's College & St. Thomas' Hospital-imeersoq, aviisimut Daily mailimut oqarpoq.

Nakorsat danskit siornatigut uppernarsinikuuaat saarnginik napiasunik nappaateqalersimagaanni siliciumi iluaqutaasartoq, imigassamulli tunngatillugu paasisaq nutaajuvoq.

Århusip napparsimavianeersoq professori Leif Mosekildep saarnginik napiasunik nappaateqalersimagaanni imigassap iluaqutaasarnera siornatigut tusarnikuunngisaannarpaa.

-Tupigissanngilarali imminnut attuumassuteqassappata, professori oqarpoq.

Taassuma naqissuserpaa tuluit ilisimatusartui ilisimatusaataat uppernartuusartut, Leif Mosekilde-li nalunaarusiaq atuaqqaartinnagu oqaaseqarusmanngilaq.